بقلم/ نوارة نجم

علي زير زير يو يو، علي زير زير ريسنا، علي زير زير يو يو

كل سنة وانت طيب يا ريس، عقبال ميت سنة، عقبال مية وخمسين سنة، ويديك الصحة وطولة العمر يا رب وما يحرمناش منك ابدا ،آه وربنا ،وربنا كمان مرة ،على فكرة انا مش باكرهك، اه وربنا، مش ح اضحك عليك واقول لك بحبك، انا لا باحبك ولا باكرهك انا ما اعرفكش اصلا يعني، انت صحيح عشرة عمري ورئيسي من ايام ما كنت في اولى ابتدائي، بس مافيش معرفة قريبة قوي بينا، وقال على رأي المثل تعرف فلان ايوة عاشرته لا يبقى ما تعرفوش

واحقاقا للحق يا ريس انا مش مهتمة قوي اني اعرفك، بس انا عندي استعداد كبير اني احبك، آه وربنا

وربنا كمان مرة

بس اذا اردت ان تطاع فامر بالمستطاع، ومش معقولة ابدا امشي في الشارع الاقي اطفال بدل ما يبقوا رايحين او راجعين من المدرسة يبقوا واقفين في الاشارات بيقولوا لي: جنيه اكل بيه يا ابلة

والناس تموت بعض على العيش

والضكاطرة اللي بيعالجوا المرضى شغلتهم في المستشفيات العامة دلوقت حانوتية، اذ مافيش اجهزة ولا ادوية ومافيش في ايدهم غير انهم يكتبوا شهادات وفاة

وبسبب قانون الطوارئ اي جربوع يقدر يوقفني ويوقف اي مواطن محترم وهو بيقول له: بطاقتك يا حيوان، شمر ووريني دراعاتك، انت بتبجح؟ طب قدامي ع الاسم وحياة امك ما انت خارج منه الا على النيابة شايل قضية مخدرات

وملايين ساكنين في العشوائيات بياكلوا من الزبالة

واساتذة جامعة لازم يدوا دروس خصوصية يا كده يا يعيشوا بالظبط زي اللي فوق دول اللي بياكلوا من الزبالة

وضرايب قاسمة وسطنا مش عارفين بتروح فين

ومدنيين بيتحولوا للقضاء العسكري

وشباب كل تهمتهم انهم بيقعدوا على النت وبيتعمل لهم امر اعتقال بعد ما حنفي يخلي سبيلهم

وفلاحين بينطردوا من اراضيهم بعد ما عشمتوهم بالحلق ودلوقت بتقولوا الارض بترجع لصحابها

وعمال بيشتغلوا بالسخرة زي ايام محمد علي وياريتهم بيشتغلوا

وكل حتة في البلد اتباعت حتى ميدان التحرير وسواحلنا في سينا

ورجال الاعمال اغبى من دود الغيطان بعد مص الغصن الاخضر ينحتوا عضم العيدان

ورغيف العيش بقى بيضة الديك ولما اتحلت المشكلة بقت الناس بتاكله بايت بمساميره

وشباب مش لاقي يتجوز لحد ما بقى كله برايز، واحنا في انتظار حركة شبابية جديدة يبقى اسمها

شباب من اجل البرايز

واخر ما بيزهق من البرايز بيرمي نفسه في البحر يا يقب ويشتغل في ايتها داهية يا يموت ويستريح

والامن فارد قلوعه علينا وطايح في البلد كأننا عبيده وكأنهم مماليك العصر، على الاقل المماليك كانوا عاملين هيبة خارجية للدولة، مش مهم يعني بيعملوا ايه فينا جوة، مدام اتقفل علينا باب واحد يبقى اللي بينا وبينهم زي القبر

والشعب كله متهم حتى تثبت ادانته، اوبشن البراءة ده مش مطروح اساسا

والناس نفسها تشتغل ومش لاقية، الا شفت حكومات كتير وقليل يشتكوا ان الشعب مش عايز يشتغل

عمري ما شفت شعب عايز يشتغل والحكومة هي اللي مكسلة تشغله غير عندنا

وكل ما نحاول نلم الموضوع ونعبر عن نفسيتنا بمنتهى السلمية تسلط علينا اخواتنا في العروبة والدين والانسانية عشان يضربونا ويقولوا علينا دسة منقلة

مش معقول منظر المحلاوية وهم مصابين ومربوطين في السراير والله لو ريا وسكينة

وكلام ابو الغيط عن قطع رجل الفلسطينيين بينما مصري يموت في المياه الاقليمية وطفلة تموت هي بتلعب في بلدها واحنا ولا الهوا ولا الدموع

وما بقاش لينا اي منظر ولا جوهر لا جوة ولا برة

وحنفي ابو دقة وغير ابو دقة وغيره وغيره

كل ده وتطلب مني احبك

انا مستعدة احبك، بس خف تعوم حضرتك

امممممممممم طبعا انا عارفة انك مش طالب مني ولا من غيري اننا نحبك، احنا اصلا مش فارقين معاك سعادتك

طب ليه احنا مش فارقين معاك يعني ياريت توضح لنا؟ يعني لو فينا حاجة غلط مخلياك ضارب علينا طناش احنا ممكن نغيرها

تحب ننفخ شفايفنا؟ ننفخ شنبنا؟ نفخ اي حاجة تانية؟

بص حضرتك، بالنوسبة للذكور هو فيه حاجات عندهم اتنفخت واتفقعت فدولم في السليم يعني اذا كان ده اللي مضايقك مننا

بالنوسبة للاناث احنا حضرتك مستعدين ننفخ اي حاجة تعجبك بس فهمنا ايه اللي مضايقك مننا؟

يعني نعمل ايه عشان نلفت انتباهك كده وتاخد بالك ان البلد دي فيها شعب

بس انا مبسوطة منك، آه وربنا مبسوطة منك، وربنا كمان مرة مبسوطة منك، قول لي ليه؟ ما قلتش طبعا مش مهم انا ح اقول لك ليه: حضرتك طلعت من المصريين ابداعات عبقرية في التهييس، حيث ان المصريين دلوقت اهو ماشيين في الشارع في حالة هيستيرية من الكوميديا السوداء، آه وربنا، لو نزلت الشارع، لا سوري، قصدي لو بعت السواق بتاع السواق بتاعك ينزل الشارع ويحكي لك الناس عاملة ازاي ح تنباساط قوي، الناس كلها ماشية تهرج على الفاضية والمليان وبشكل هيستيري، ده غير..شوف، شوف حضرتك احنا عاملين ازاي، الناس بقت تكتب لك شعر وتألف فيك اغاني وتبتكر عشان تعبر عن انها طلعات ميتين ابوها وكل ده عشان يلفتوا نظرك

بس انا احب التقل، آه والله، ما احبش الراجل الخفيف ده اسم الله عليك تقيل تقيل يعني

عارف بتفكرني بواحد بلدينا كان بينصح اخوه: اول ما تتجاوز تشكم مراتك، بمبكت معاك في الكلام لا تضربها ولا تشتمها ولا تصالحها ولا تراضيها، جال له امال اعمل ايه يا اخوي جال له: تطنشها خالص، تجاهل تاااااام، عارف؟ الوالية مرتي زودت في الكلام ليلة الدخلة من يوم ما اتجوزتها لدلوكيت لساني ما بيخاطبش لسانها راخرة متأدبة

جال له: واصل؟ جال له: واااااصل، جال له: امال الاربع عيال دولم جم منين جال له: ولاااااااا سألتها

انت عارف؟

وربنا انا متفائلة خير، اصل دي تصاريف ربنا، انت ربنا يديك الصحة وطولة العمر ح تتم تمانين، واحنا وصلنا تمانين مليون

الصدف دي بيقول لك بتبقى فال خير ان شاء الله

يعني مسيرك تحس بينا حضرتك ان شاء الله يعني

هو بالنوسبة لرأيك فينا احنا وصلنا شوية كلام كده كنت قلته لليلى الاحمد الصحفية الكويتية في ساعة صفا، قلت لها : الشعب المصري همه على بطنه وشعب تافه وانا ح اكله منين؟

يعني ممكن تكون قلت الكلام ده في ساعة غضب البيوت ياما مقفولة على بلاوي ومصارين البطن بتتعارك وفي الاخر احنا مالناش الا بعض مش كده؟

بس فيه كام نقطة احب اوضحها لحضرتك

اولا حضرتك احنا مش عايزينك تأكلنا والعياذ بالله، احنا الناس عايزين يشتغلوا ويأكلوا نفسهم لو تسمح يعني

يعني رجال الاعمال اللي طايحين في دين ام البلد دي مش بيعملوا مشاريع عدلة وتنموية تشغل الشباب، بس ياريت تشغل الشباب الجربان

اصل مش عارفة بلغك وللا لا، رجال الاعمال بيشترطوا خريجين جامعة امريكية، وياريت يبقى لائق اجتماعيا

فاكر غير لائق اجتماعيا دي؟ فاكرها؟ اللي اتسببت في انتحار شاب من انبغ واذكى شباب مصر؟

معلش بقى الله يرحمه كان حساس زيادة

ثانيا: هو حضرتك بتسأل تأكلنا منين؟ من المكان اللي بتاكل منه، ماهو واضح ان حضرتك بتاكل كويس ما شاء الله يعني بالهنا والشفا

بس سيادتك تاكل وتعمل الوزن ده كله والناس تجوع؟

ثالثا: ماهو حضرتك عمرك ما ح تأكلنا لان اللي انت مش واخد بالك منه ان احنا، لامؤاخذة، من ضرايبنا اللي بنأكلك، وبنأكل معاك الاسرة الكريمة، وكل طقم الوزراء والوزارات اللي بتتناوب علينا

بالهنا والشفا

طعم الاكل المصري حلو مش كده؟ وللا انتوا مش بتاكلوا من مصر

آآآآه صحيح ده الاكل متسرطن، واحنا احرص ما نكون على صحة سعادتك، مش معقولة تاكل من الاكل المتسرطن اللي امثالنا من الجرابيع بياكلوه ده اذا لقوه اصلا

طبعا حضرتك كتر خيرك ويخليك لينا امرت بانهم يوجدوا موارد عشان العلاوة

من تحت قطاقيط الارض، بس حضرتك احنا كان ياما كان عندنا غاز طبيعي بس طار في الهوا شاشي وانت ما تدراشي

يا جدععععععععععععععععع

هلبت اسرائيل دي لو كانت ماسكة علينا صور مخلة بالاداب ما كانتش عملت فينا ده كله، طب حضرتك يعني الوضع ايه دوقت حاليا؟

ده مجرد سؤال بريء يعني

طب حضرتك كمان الناس المحبوسة بقالها خماشر تمناشر سنة على ذمة التحقيق وكل شوية حنفي يخلي سبيلهم ويتعمل لهم امر اعتقال، هلبت دي ناس لها اهل، والاهل دوكهمة قبل ما يناموا وهم حاطين راسهم على المخدة بيقولوا: حسبي الله ونعم الوكيل ربنا ع الظالم والمفتري

هلبت ايه بقى؟ ها؟ ايه؟

على فكرة، طبعا انا مش محتاجة اقول لحضرتك ان ربنا موجود يعني

وللا محتاجة؟

ان شاء الله ما احتاجش ولا حاجة

على فكرة، انت واخد عننا فكرة وحشة والله، احنا مش وحشين زي ما انت فاكر يعني، ده احنا امرا وطيبين

واذا كان جمال بيه بيتضايق من ريحتنا فهلبت حضرتك لزمن وحتمن تفهمه ان تسعين في المية من سكان العشوائيات مش بيوصلهم مية وسكان العشوائيات دولت يبقوا خمسين في المية من سكان مصر، وبما ان جركن المية باربعة جنيه فالناس يادوبك بتشرب ومافيش رفاهية انها تستحمى

هو ده يعني السبب في الريحة اللي مضايقة جمال بيه، هو باين عليه انه متضايق منها قوي، كل ما يكلمنا يكرمش مناخيره كده ويقلب شفته الظاهر الريحة واصلاه وللا حاجة

انما احنا في العموم ناس كويسة وربنا، صحيح انت بتحب بلد الاكصلانصات، بس الاكصلانصات دول وجع دماغ

ح يقعدوا يتكلموا عن الفساد الاداري، ويتكلموا عن تداول السلطة، والانتخاب النزيه، والحرية، والديمقراطية وكلام قبيح كتير من دهوت اللي انت عارفه انما احنا ناس كويسة

احنا كلنا، كلنا، مسلمين ومسيحيين مؤمنين جدا بحديث الرسول صلى الله عليه وسلم: من بات آمنا في سربه، معافا في بدنه، يجد قوت يومه فقد حيزت له الدنيا بحذافيرها

بس ده اللي عايزينه، هي مطالب صعبة شوية

عشان موضوع آمنا في سربه ده ح يخلي حضرة البشوات الظباط والبهوات امناء الشوربة اسم الله ما يوقفوش الناس في الشارع

وما ينصبوش اللجان في الطريق عمال على بطال وما يطلبوش الرخص والبطاقات وطبعا الايد البطالة نجسة

وموضوع معافا في بدنه ده مستحيل مع الهرمونات اللي في الفراخ والخضار المتسرطن ومستشفيات الدولة اللي مافيهاش غير الريفو وقانون التأمين الصحي الجديد

ويجد قوت يومه ده تهريج ده اللي احنا بنطلبه، قوت ايه؟ الرغيفين ونص اللي الضاكتور نظيف امر لنا بيهم الناس مش ممكن حد يلاقيهم

بس مش لازم عيش، ممكن ياكلوا بقسماط، ياكلوا حلاوة يا كلوا جاتوه ياكلوا كل اللي يحبوه

وطبعا القوت لازم له مية، والمية عند مصلحة المياه، والمصلحة عايزة نجار والنجار عايز بيضا والبيضا عند الفرخة

اممممممممممم طب دي طلبات الدنيا بحذافيرها

واحنا عايزين ايه من الدنيا؟ الدنيا فانية، وما دايم الا وجه الله

على رأيك كفاية علينا الآخرة

بس والنبي، والنبي، ومن نبى النبي نبي، اصرف للسادة الوزراء طيارات هالوكوبطر

اصل العلاوة اللي حضرتك اديتها لنا ح تتشفط في التأخيرات اللي ح تتحسب علينا واحنا واقفين على الكوبري مستنيين معاليه وسعادته وفخامته وكمالته وحلاوته لما يعدوا كلهم

كل سنة وانت طيب كمان مرة