مين قتل بكره؟ قالوا الشجر

شعر‏:‏ بـهاء جاهين

------------------------

كل شيء مرهون عند عم خراب المرابي العجوز

اللي عنده السما
والقمر

مين قتل بكره؟ قالوا الشجر
قلبي يا حفرة
كنت يوم بركان
عتمتك فيها نار
فيها نور

مين قتل بكره؟
حاكموا الزهور!
ربنا شاهد
أن خصمي الحكم

كل شيء اتلجم
كل نور اتركب
الصباح هامد
ريحته فاحت خلاص
حتي حلم الخلاص
في البلد زاهد

جم عيال مضروبين بالخيال
بالجمال
مضروبين بالوطن
بالإيمان بالمحال
مضروبين بالرصاص
زلزلوا الوضع.. زلزال
وشلال آمال
لاكتساح العفن

الكبار قالوا شكرا.. كفي
العيال قالوا لأ فيه مازال
الكبار قالوا لأ.. دا سفه
دا جنون
دا كلام فلسفة
حلم واسع علي الواقع الحيزبون
دا كلام لن يكون
دا انتحار

مين قتل بكره؟
قالوا: الصغار!
قالوا بكرة قتل بكره
قام صدقوا الطيبين

العيال عبروا عن غضبهم
بحبة أغاني وسباب
الكبار قالوا: قلة أدب
تستحق العقاب

وانتشر في المدينة البشر والكلاب
والرصاص

مين قتل بكره؟
حلم الخلاص!
قالوا بكرة قتل بكره
قام صدقوا الطيبين

حضرات القضاة
هي تبقي الحياة تستحق الحياة
لو مفيش في العيون
أي لمعة جنون؟
لو مفيش في البلد دي
سوي حكمة الميتين؟

حضرات القضاة
أنا أتهم تجاعيد الركود البليد البدين

آهه اللي قتل بكره
ماضي السنين