بيئة
أجلس على مكتبى منهمكاً في كتابة بحثى عن الصراع العربى الاسرائيلى، أجد العامل أبو المجد يقول: يا أستاذ ماهر، كلم ولى أمر طالب عاوزك بره، ومايقدرش يدخل هنا.
رفعت رأسى، ونظرت له وقلت: حاضر يا سيدى سوف أذهب له.
صعدت السلالم إلي الدور الثانى، وأمام مكتب المدير، وجدت امرأة جميلة جدًا، تشبه صباح المطربة فى عزها، ووجدتها تقول: أستاذ ماهر العمورى.
رديت: أيوة يا فندم.
قالت المرأة الجميلة: أنا والدة أحمد عادل اللى عندك فى فصل أولى ثانى.
وبسرعة تذكرت ذلك القرد الذي تتحدث عنه، وفى بالى قلت معقول الجمال ده ويخلف القرد ده.
وبادرت متسائلاً: خير يا أفندم؟
قالت وهى تنظر إلى فى نظرة مباشرة: على فكرة أنا مدخلتش للمدير علشان أقوله وقلت أكلم حضرتك فى البداية.
في ضيق منى قلت لها: خير يا فندم؟.
قالت وهى تنظر إلى طفل صغير معها، كان يختبئ خلفها.
ده رامى أخو أحمد.
قلت: أهلا وسهلاً يا رامى يا حبيبى.
نظر الولد إلى، ثم اختبئ خلف والدته.
قالت لي: تصور يا أستاذ الولد الكبير شتم أخوه الصغير.
قاطعتها قائلاً: طيب وأنا أيه دخلى بالموضوع ده.
قالت: عندما سألته يا مودى جبت الكلام ده منين، قال لي انه سمعها من سيادتك، وقال أستاذ ماهر العمورى بيقولها لنا في الفصل عندما يكون فيه هيصة. شوف حضرتك أنا سكرتيرة وزير التعليم، وأنت عارف وزن وزارته أد أيه، وزوجي سكرتير خاص فى رئاسة الجمهورية.
عندما سمعت إذناى سكرتيرة وزير التعليم ودي لوحدها كافية، تجيب لى الكافية، وزوجها في رئاسة الجمهورية، يعنى ما الفصول كانت كثيرة أمامى كان لازم اختار الفصل اللى فيه ابن الست دى.. استر يارب.
وأكملت حديثها: أنا مرضيتش أدخل إلي البيه المدير، واشتكى المرة دى، لأنه مش هيعجبه أن مدرس في مدرسته بيقول اللفظ ده.عارف الولد الصغير ده في مدرسة أجنبيه بادفع له في السنة 15 ألف جنيه.
وفى أثناء حديثها معي كان الطلاب في فناء المدرسة، ينظرون لى ويشاورون إشارت على تليفون، وعلامات أنهم سوف يتصلون بالحكومة. (زوجتي طبعاً) شباب الثانوى ظريف مش كده.
ولم أجد ما أرد به، ولا أعرف ماذا قال ابنها الكبير لابنها الصغير، طب وأنا مالى، أخ شتم أخوه وأكيد لازم الحمار الكبير يقول لها إننى اللى قلت كده... دمى محروق... مش عارف أرد عليها.
وفى أثناء ذلك يخرج مدير المدرسة، ويصرخ وهى تنظر إلى، وهو خلفها، وكأنه لم يراها.
وبعلو صوته يقول: انتو فين يا ولاد الـ....... مين اللي عند العيال دى، ونزلهم الحوش مين....... و(سب الـ.. للعيال) واللي سابهم ينزلوا، ويسيبوا حصصهم.
وجدت المدام الجميلة البيضاء اللون يتحول وجهها إلى لون أحمر قانى وتتحدث بلجلجة: أنا آسفة قوى..... مع السلامة.
رديت عليها مذهولاً: حضرتك مش حتسمعى أى مشاكل تانى.
بحثت عن الولد، وسألته ماذا قال لأخيه.
قال الولد: قولت له يا بيئة وسخة.
نظرت للولد وقلت: وبعدين.
الولد: أصله ضربنى، وماما قالت لى أنت جبت اللفظ ده منين، قلت لها أن حضرتك بتقوله لنا في الفصل.
ضربت كف بكف، وقلت للولد: وأخوك تشتمه وده معقول أنا أقول يا بيئة وسخة على مين على أكابر البلد، وكانت عاوزة تشتكينى لمدير المدرسة الراجل الطيب اللي لما بيتنرفز يصل إلى سب الـ....
كلمة بيئة وسخة كارثة أكبر اثر من كارثة العبارة والقطارات اللي بتدخل في بعضها، ولا بتتحرق، وقلت لنفسى اسكت يا لسانى خليك يا بنى ماشى جنب الحيطة، ولا جوه الحيطة أحسن وأرجع أكمل بحث الصراع العربى الاسرائيلى....... آه يا بيئة وسخة.
تمت
