على الورق
لِيه حِلمِنا فِينَا اتسرَق
حتى الأمل برضو اتخنَق
هو الوَطَنْ معنَاه كِده
إسم بَسْ على الوَرَقْ
الإسم بَس احنا عرَب
وقلُوبنا أنشَف م الحَطَب
واللّى قتل واللّى خَرَب
فضَايحنا كِترت ع المَلأ
دا إسم بس على الورق
هو حق القدس فين..!
ياقدس ليك متأسِفين
طبعاً هانعمل ميتّين
إصحوا بقى دمّى اتحرق
بقيتوا ليه كلمه ف ورق
يافرحتى بتِستنكروا
فى الضعف بس تفكّروا
والله فعلاً تِشكروا..
إيه يعنى أقصى يتشنق..!
يا أُمّة بس على الورق
الغرب عارف ضعفنا
حبَسنا جُوّا ف كهفنا
يكتب بإيديه عُرفنا
ونسينا شرع اللّى خَلَق
بقينا إسم على الورق
القدس زعلان مِننّا
دمعُه ياناس بيهزّنا
مين غيره بس يهمّنا
من ضعفنا حجَرُه نَطَق
قال إننّا زى الورق
أيوا إسم على الورق
إمتى هاتشرق شمسنا
إمتى هايرجع قُدسنا
إمتى هايبقى جِنسنا
مرّه فى أوّل السَبق
بقينا إسم على الورق
إمتى هانبقى يوم كِده
إيد واحدة تضرب العِدا
ياقُدس لِيك رُوحنا فِدا
إمتى نصحّح الخطأ
ونبقى واقع مش ورق
إذا كنت ناوى يا وطن
تعيش تِطاطِى لِلمحن
وناس تموت من غير تمن
يبقى خلاص بقى نِفترق
يا إسم بس على الورق
بقلم/ سيد عبدالوهاب
