صورة وسؤال
صورة وبتسأل سؤال
ياترى فين الرجال..!!
لمَّا هان عرضهم
لمّا تِنداس أرضهم
هُوّ إيه كان رَدُّهم..!!!
بيقّتلوا فى بعضهم..
كلمة بجد ياناس تِتقال
هُمّ أساساً يبقوا رجال
هيَّ فين بس الرجوله
إمتى كان الخوف بطوله
الرجال مابقُوش رجال
أيوا ساكنين فى المَسارِح
فِكرهم فى الرقص سارِح
والعرُوبة بقت مصالِح
والكرامة دى شىء مُحال
صورة وبتحكى حاجات
تحكى إن ضميرنا مات
تحكى إن العزّة حِلم
إندفن تحت السُكات
يا أُمة عايشه بالشِحاته
بقيتِ زى خيال مآته
زى جسم من خشب
مكتوب عليه دُول العرب
البنت دِى فين حقّها
مِ اللّى ضرَبها وزقّها
شايفين عيونها بتشتكى
بتنادى فين همّ الرجال
قومى ياأُمّة واتعبى
أرجوكى مرّة إغضبى
عرّفى كل الوجود
التاريخ ممكن يعود
والبسى تُوب الأسود
وانتى عايشه مع الديابه
حد فكّر فى الإجابه
ردُّوا ياولاد الحلال
صورة وبتسأل سؤال
..........
سيد عبدالوهاب
أعجبنيعرض مزيد من التفاعلات
