( إللي بنى مصر )
~~~~~~~~~~~~~~~~~~~~~

اللي بنى مصر كان ف الأصل فلاح 
روى ترابها من دمه لحم عشانها جراح 
ويجيلها ألف صباح يتوضا من نورها 
لامره يوم اشتكى ولاعمره كان نواح

اللي بنى مصر كان صياد 
ركب مراكبها وراح يصطاد 
يصطاد أعاديها والخاينين 
وبروحه يحميها م الأوغاد

اللي بنى مصر كان ولد عتره 
رمى بذرته طرحت لنا الفكره 
والأرض واحده لكن شتان 
مابين بذره .. وبين بذره

اللي بنى مصر كان جدع وفتوه
لو مره قالت آه نبوته كان قوه
كان دفه تهديها وتعدي بيها 
بحور أحزان لو هاجت النوه

اللي بنى مصر ف الأصل كان جدي
ف كل شده يقول أهي أزمه وتعدي
بلدنا يابني عفيه والرك ع النيه
خليك للوفا عنوان وزي ماتاخد تدي

إللي بنى مصر ف الأصل كان خالي
كان قلبه صفصافه ضلتها تحلالي 
قالوها ف الأمثال الخال كما الوالد
والحظ لو عاند بالصبر يصفالي

واللي بنى مصر ف الأصل كان عمي
لما ابويا مات هو اللي شال همي
فرش لي قلبه مراح وبحبه غطاني 
طيب ف قلبي جراح ماهو دمه من دمي

واللي بنى مصر كان خالي وكان عمي
وجدي اللي كان فلاح وابويا اللي من دمي
وكل ناسها الطيبيين بالوفا مربوطين
ف رباط متين ليوم العرض على ربي

~~~~~~~~~~~~~~~~~~~~~~~
بقلمي ........
معوض حلمي
منشأة بطاش 
تمي الأمديد 
دقهلية