من وقت للتاني بنلاقي نفسنا محتاجين نبعد شوية عن كل اللي حوالينا ، نبعد شوية عن الصورة عن مسرح الأحداث ، نبعد حتى عن الناس اللي بنحبهم 
الفترة دي مهمة جدا بالنسبة لأي حد 
فترة راحة وهدوء ومراجعة حسابات وفلترة ناس دخلت حياتنا رغما عنا أو عن طريق الصدفة وفترة قياس مقدار غلاوتنا عند الناس اللي بنحبهم ويحبونا وهل لو اختفينا لفترة هيدوروا علينا بجد ولا وجودنا وعدمه واحد 
حاجة كده عاملة زي الحسابات الختامية وميزانيات نهاية العام عند الشركات ..
فترة نحسب فيها مقدار ما كسبناه أو خسرناه في الأيام اللي فاتت من عمرنا سواء كان المكسب أو الخسارة دي حاجات مادية أو معنوية ، طموحات وأحلام ، أو حتى بشر 
وهل خسارتنا لبعض البشر تستحق الحزن ولا خسارتهم في حد ذاته كان رحمة من ربنا
بينا لأن وجودهم في حياتنا كان واخد حيز ومساحة كبيرة عليهم هما ميستحقوهاش 
وبين مكسبنا لناس تانية أحلى وأصفى وأنقى مجرد وجودهم في حياتنا بيخفف كتير من ضغوطات الحياة علينا حتى ولو مبنقابلهمش كتير بس وجودهم بيدينا الدعم النفسي والمعنوي اللي احنا محتاجينه..
محتاجين فترة نقيم فيها علاقتنا بربنا وهل احنا فعلا ماشيين على الطريق الصحيح ولا بعدنا والحياة خدتنا بعيد
كل واحد فينا محتاج الفترة دي يبعد فيها مع نفسه عشان يقدر ينقي روحه ويصفي نفسه 
من كل حاجة أثرت فيه وغيرت من ملامحه وبعدته عن شخصيته الحقيقية ونقدر نرجع تاني من جديد للحياة ومعاركها بس المرة دي بشخصية جديدة متفائلة مقبلة على الحياة واقوى من الأول بكتيييييير

#زهرة _العدوي