ستات حارتنا
حكايتنا حكاية عجيبة حكاها السيد طارق السيد
عن ستات في حارتنا لكن رجالة بدرجة جيد
الست نعيمة العايقة بنت السيد حمدي إمام
بتقول للست أم أحمد أحمد جالها في أحلى منام
خطفها على حصان أبيض زي ماشافت يوم في السيما
ردت ست أم أحمد قالت إبقي إتغطي ياست نعيمة
وأم حماصة نادت لحماصة ياواد ياحماصة إطلع هنا فوق
رد حماصة بكل غلاسة وبرود دم وقلة ذوق
لأ وألفين لأ مش طالع نادت تاني عمل مش سامع
نزلت دوغري بفردة شبشب تضرب فيه طب إيه المانع
أم وبتربي في حماصتها يعمر بيتها ويحفظه ليها
بكرة حماصة يعرف إيه قيمتها يوطي ساعتها يبوس في إيديها
والست صفية مرات الأسطى علي الحلاق
ودي ست قوية ومستقوية بجوزها وأخوها علاء
على ست سكينة الساكنة فوقيها مرات الأسطى رضا السباك
علشان نقط مرة غسيلها على قرعة جوزها الحلاق
والست سميرة بنت أخت منيرة مرات الأسطى ذكي النجار
ليل ونهار على راسه تدق هى شاكوش هو المسمار
والست سمارة بنت أم سمارة زينة الحتة وكل الحي
دايب فيه شباب الحارة واللي يروح بيقول للجاي
خفة وحيلة وعينها كحيلة وعودها نحيل وطويلة التيلة
وإللي يفكر يوم يعشقها يكون شمشونها وهى دليلة
أدي ستاتنا وآدي حكاياتهم وأدي إجوازهم وآدي حياتهم
قولوا ورايا تحيا الستات ينصرهم ويعلي رايتهم
بقلم طارق السيد