الثالثة بعد منتصف الوجع
رواية من تأليف عصام قابيل
الحلقة السابعة
******************
استطرد مخلص قائلاً :
-رحت وأنا مستغرب ، لقيتهم بيكلموني وهما حاطين وشهم في الأرض وبيقولولي :
- صافي جالها فشل كلوي
اتخضيت وطلعت مني شهقه سريعة وقلت :
- لاحول ولا قوة إلا بالله
قالولي وهما كأنهم بيوقفوني ، ومحتاجة عملية زرع كلى ضروري .
يعني محتاجين متبرع والعملية هاتتكلف كتير جداً ، رديت وأنا مش دريان بنفسي :
-فداها كل فلوس الدنيا !
التزموا كلهم الصمت رحت رادد عليهم :
-إيه ، مستنيين إيه ؟ أنا هاستدين وهابيع اللي ورايا واللي قدامي، وربنا يشفيها إن شاء الله
رد عارف وقد بهره الموقف وشد انتباهه جدا :
-وبعدين عملت ايه يامخلص ؟
رد مخلص مقتضباً :
-أبداً عملت إعلان ، وكلمت كل صحابي ومعارفي ندور على متبرع يكون بنفس الشروط المطلوبه والحمد لله الوقت ماطولش وجبت متبرع ،وخليته قابلهم وقعد معاهم، وقلت لهم انا هاروح معاه نشوف ايه الي هانعمله...
بعت كل مااملك واستندت من كل حتة لكن سبتلها عفشها
والحمدلله عملنا الفحوصات الكاملة ،واستعدينا للعمليه وبعد فترة بسيطة وهي لسه منتظرة العملية جالي شغل في الخليج ، فاضطريت أسافر علشان الالتزامات اللي علي والديون الي جدت فسافرت من غير ماأقول لحد منهم بعد مااطمنت علي صافي إنها بقت كويسة ،يعني بعد ماسألت علىها من بعيد ،واطمنت عليها لاني مقدرتش اشوفها ولااوريها وشي لانها كانت برضه رافضه تقابلني أصلاً ، ومعرفش اهلها قالولها إيه بالضبط ..
قعدت فترة وأنا بطمن عليها بالتليفون عند أهلها لحد مامرة لقيتها على التليفون بتقولي :
- إنت خلاص رميت طوبتي ،وخدتني لحم ورمتني عضم يامخلص ،ومش هاين عليك حتي تيجي تشوفني ؟
قلتلها :
- اللي اأعرفه انك إنت مش عاوزة تشوفيني قالتلي :
- انا زعلانه منك كتير ولكن لما عرفت إنك تعبت علشاني فرحت ، واتبسطت برضه
رد عارف - وقد تهلل وجهه - :
-طيب الحمد لله كده تمام ...ها وبعدين
إستطرد مخلص قائلا :
-ولكن ماكنتش أقدر أرجع في التوقيت ده ؛ كان ورايا شغل كتير ،وتعبت شوية لكن استحملت ، لكن فوجئت إنها بتكلمني بشوق وحب اول مره احسه في صوتها....طبعا بقيت طاير من الفرحة وقطعت شغلي ورجعت، وطلبت منها تروح شقتنا فوافقت
ودخلت عليها طاير من السعادة بعد فترة هجر اتصالحنا برومانسية عاليه وقضيت يوم جميل من أحلى أيام عمري، لكن الفرحة ماكملتش رد عارف مذهولاً :
- إيه اللي حصل
#عصام_قابيل