زيدي عَلَيَّا المحن
ارميني ف الشارع
لِمي ف نجوم الليل
قولي دا واد صايع
اوعوا تسيبولوا الضي
دا مجَرِّس اجدادي
قال ع الحجاره غَي
ب يسب ف امجادي
وانا اللي ف الزحمه
بأشكي لْ حواريكي
ياك زادت اللحمه!!؟
قولي لْ حواريكي
والحاشيه والنياشين
بزياده تخريفك
البَلَّه جات ع الطين
وأنا مَحْشي ف رغيفك
ومكَتَرَه السلطات
وافكاري مهروسه
مضغوط وكلي آهات
بعترتي ف الكوسه
لميها ف اي رغيف
ما اتقطعيش قلبي
يعني لأني شريف
الذنب بقى ذنبي
طُلي بعين الرضا
ياطاله من قصرك
لَمَّا نويت الوضا
غابت شموس عصرك
عَتَّم نهارك ليل
وسرحت بدموعي
واكمني خفت الويل
محرابي كان جوعي
والقلب قلبه اتملى
يامسرحالي شعور
هدعي واقول ف الصلا
لِمي القزاز مشعور
هدوس عليه ف الأرض
ما ناقصشي انا تجريح
تبطل صلاة الفرض
يامنسيه التسبيح
لِمِي الكلام لمي
من قلبنا البَكَّاي
واقري التاريخ سَمِّي
ياأم القليب نَسَّاي
دا تاريخك مسافر
ومودعه فرعون
كل اللي ب يعافر
كاتبه عليه ملعون
عنه وب تغضي
طَرْفِك دا غَض جميل
وبدمعي متْوضِّي
علشان عكار النيل
