‏

اتصلتي بِيَّا إمتى؟؟؟!!؟؟
لَجْل تاخدي على خاطرك
كان معادنا الساعه سِتَّه
ولَّا فات بسرعه قَطْرِك
ولَّا فاكره قلبي لِعْبه
ف إيديكي تحركيها
يااللي كنتي لَيَّا كَعْبَه
الطواف أحلى ما فيها
انتي مين علشان أغامر؟
واكسر القلب اللي حيلتي
اللي كان بالحب عامر
ضَل حُبُّه لَمَّا شِيلتي
الخيانه والعهود
اللي لَمَّا غدرتي بيها
الكامنجا وَيَّا عود
عَزَفت الآهات وفيها
كل قصايدي اللي شهدوا
ضِحْكِنا لَمَّا هديتك
زي كام حبيب بيهدوا
فاكره ف ميلادك عيديتك
اللي بعد معرفتنا
لَمَّا جيتي وجبتي مانجه
وصاحبتك لَمَّا شافتنا
وادِيتِك أحلى كامنجا
صاحبتك قالت ياعيني
ع الهدايا يارومانسي
واللي كان بينك وبيني
أجمل العطر الفرنسي
اللي صاحبي بعته ليا
من محلاته ف باريس
قلتيلي احلى هديه
عطر نادر دا ونفيس
قلتهالي بالظبط انتي
كده بالحرف اللي غَنَّى
ف وداني لَمَّا بِنْتي
ب ضحكه خَلِّتْني ف جنه
وصحابك قالوا رَشَّه
لو سمحتي م العطور
بس قلتي بلا دوشه
دا حبيبي واد غيور
فاكره طيب جواباتك
والشفايف الحُمْر طَبَعوا
أحلى حُب ف كلماتك
والورود لَمَّا نَبَعوا
من جمال حرفك وضَيُّه
آه ياغيرة الأبجديه
لَمَّا جولك هما حَيُّوا
وكل حرف جاب هديه
فاكره لَمَّا سمعتي شِعْرِي
واديتك أجمل ديوان
ياللي شَيْبْتِيلي شَعْرِي
ليه قوليلي كُلُه هان؟!!؟
فاكره إنك تحْبِطيني
وتلعبيلي ف مسرحيتك
البريئه الْ تحوطيني
بدراعك واللي ريتك
بيه تضمي كل حاجه
من حاجاتي الْ جبتهالك
فاكره طاب نَص (الدجاجه)
اللي يومها قلت مالك؟
قلتي قصه دي سخيفه
الدجاجه تخونشي ديك
الدجاجه دي لطيفه
لبسها اللي أصله شيك
ديكها قايل لبس عاري
لانه مش عارف يِجَمِّل
صوره حلوه وب يداري
قصته إياك تِكَمِّل
قُلت حاضر ياحبيبتي
انتي أصلاً تؤمريني
إمتى تبقيلي خطيبتي؟
ولْ باباكي تقدميني
لمََّا اتاريكي ب جداره
قُمْتي بأحلى تمثيليه
ماتلي حَبك ياخساره
قلبي بَيَّن جَرْحُّه لِيَّا
والقصايد والهدايا
والكلام العسلي راح
والكابوس كان روايه
عَبِّيتيها بالجراح
واللي دايب ف عينيكي
نظرته ياستي واهيه
غوري مش هندم عليكي
روحي روحي ف ألف داهيه

#محمد

تعليق