صباح صافي
@@@@@@@@
صباح الفل يا بلادي
صباح صافي صباح نادي
صباح المسك والعنبر
صباح ع الدلتا والوادي
صباح بالورد متعطر
صباح مخصوص علي سينا
ف يوم النصر متسطر
صباح ع المرسي والمينه
صباح الخضره والمنظر
وصوت المدنه بيكبر
صباح ع الكل بينادي
وصوت القلعه والازهر
صباح بالفرح متبسم
صباح بيغني ويقسم
وصوت الضحكه بيقرقر
ويفتح للقلوب فرحه
ولقمه طعمها سكر
ف إيد فلاح علي الترعه
بيروي الارض ويخضر
ويهدي للعيون شمعه
ف عز الضلمه بتنور
ورمش غزال بيتمخطر
يلم الورد ويهادي
صباح الفل يا بلادي
صباح صافي صباح نادي
@@@@@@@@
بقلم ////// طه إبراهيم
