(((كلمتين)))
كلمتين في حب أمي
انتي ليه سايبني حزين
دايسة فيّا وزايدة همّي
أيوه جرحتني سنين
عمري بفديها ب دمي
وهيّا مش عارفاني مين
عمرها ما حست بألمي
أنتم ليه مستغربين
هيّ حلم بكرا ليّا
هيّ لحن وانا الاغنيّة
هيّ شجرة مضللة
بس مش بتضلل عليّا
هيّ صورة معبرة
بس أنا مش ف الصورة ديّا
هـيّ فين وأنا فين
فيها رمز الحضارة سنين
وأنا واحد من شعبها
حدّ فيكم يُقلها
إني أبقى ابنها
أمي ما بتعرفش تحضن
إلا القريب من حضنها
علشانها نزلنا نهتف
كانت دموعها دم ابنها
علشانها قلنا يلا نرحل
وفي البحار غرق حلمها
إمتى يمّا تحسي بينا
إمتى يمّا حتشفوينا
مرة واحدة وتحضنينا
إمتى يمّا تقربينا
وبإيدينا نمسح دموع الحزينة
أمي ما بتعرفش تحضن
إلا اللي تشوفو منها
إنتي فين مش لاقي خيرك
ليه يحسّ بيّا غيرك
احضنيني من غير دموع
وأنا هفضل عمري طيرك
سبتيني أهاجر البلاد
ردي يا أم الولاد
كلنا بنحبك إنتي
إلا دا ما فيهوش عناد
إنتي فين يا أم الهرم
مش لاقيكي
لسه شعبك كل ليلة بناديكي
نفسه يرسم فرحتك
نفسه يلاقي محبتك
يا مصر يا أمي
بالحنان والحب
يلّا نرسم سكتك
تبقي يا مصر أحلى صورة
وأبقى فيها ضحكتك
كلنا بنعشق ترابها
حتى لو غصب عنها
أمي ما بتعرفش تحضن
إلا القريب منها.
بقلم. الشاعر. محمود فرج. ..
التعليقات
اكتب تعليقًا...
