( أمي ) ..
................
مش هاقول حته من قلبي
مش هاقول هي نبض روحي
مش هاقول اغلي حاجه عندي
وف غيابها
تروح روحي.... تنزف جروحي
مش هاقول لما اكون تعبان
بروحلها
واحط راسي علي صدرها
مش هاقول كل الكلام ده
... فهمت خلاص..
# أمي.........
امي فعلا ماحسيتش بيها
الا لما بقيت أب
ساعتها
بقي عندي اجوبه كتيره
ومليون رد
لأسئله كتيره ...كانت بدور جوايا
في العقل..مش في القلب
فهمت ليه..كانت بتضربني
فهمت ليه..كانت بتصرخ عليا
ده عيب
ده غلط
ده يتعمل
وده مايتعملش
فهمت ليه..
كانت مُصره تقومني من النوم بدري
حسيت....
لما كانت تقولي
كفايه يابني
تعبتلي قلبي
فهمت..إلحاحها ع المذاكره
فهمت..الحمد لله اللي كانت علي لسانها
فهمت سراحنها..
وليه دايما مشغول بالها
فهمت ليه..
لما كانت تقولي شوف فلان وفلان شاطرين
عايزاني أغير.......
واكبر في طوعها واشرفها
دي لوقتي وبعد السنين
لسه جاي افتكر جمايلها
#سامحيني_ياأمي
مع اني عارف
ان انتي مش محتاجه
اني اقولك الكلام ده
علشان قلبك يامه
مسامح.. وشايف..وعارف
قلب ابنك من جوه
مش من بره..
احنا اللي الايام وخدانا
ويمكن بالايام مانسألشي
وبيزقنا لقدام دعاكي
وفاكرينها احنا شطاره
مانعرفشي
ان رضاكي ودعاكي يامه
هما اللي سندينا..
ومقوينا
ومقومينا
في الدنيا دي
مابنقعشي
#سامحيني_ياأمي..
بقلمي..
ماهر البساطي
أعجبني
