معوض حلمي شاعر عامية

( راضية ومرضية )

~~~~~~~~~~~~~~~~~
زي أهل زمان
أبويا كان طمعان ...
يجيب م الولاد دستة...
وستي بالواسطة ...
قالت كفاية كده
وصل العدد سته ...
تلاته ولاد وتلاته بنته
وستي كات شاطرة ...
كان فيها شيئ لله
ربتنا ع الفطرة ...
وابويا على نهجها
ماشي بأمر الله
وانا منه باتعلم ...
تتبع خطايا خطاه
ولما الزمن سلم ...
على وشها وعلم ...
عدى وساب ذكراه ...
وابويا يحضنها
عشان يطمنها
تفرح تقول الله ...
ولما اجي أحضنها
وابص ف عيونها
تفارقني قولت آه
ويلاقي قلبي دواه ...
وتضمني ضمه
وابويا يتسمع
يقول لها يامه ...
الواد بيدلع ...
تقول ياواد مالك
غيران وهتولع ...
وتضحك وتتبسم
وتقول ياواد قسم ...
إلبس كدا وارسم ...
ياروحي وعنيا
دا اللمسة من إيدك
بتزيدني حنيه ...
والنظرة من عينك
لجرحي مداوية ...
ومرت عليها سنين
من العدد ميه ...
حست طلوع الروح
والأصل مش بالكلام
الرك ع النية ...
ندهت عليا ف يوم
تلزمني بوصية ...
قالتلي لما أموت
مش عايزة أسمع صوت
ولا عايزة أسمع زيطة ...
خليني أدخل قبري
وروحي مبسوطة ...
أنا عشت بينكم عمري
راضية ومرضية ...
وقف الكلام ف الزور
محشور رفض يطلع
والقلب كان يدمع ...
ومشينا ف المشهد
وربنا يشهد ...
سمعنا زغروطة
مظبوطة ع النية ...
كأنها زفة
وعروسة متحنية ...
وهيى بتودعني
بنظره من قبرها ...
نسيت ترجعلي
أمانة كات عندها ...
كات روحي ف عيونها
وخدتها حنيه ...
كات روحي ف عيونها
وخدتها حنيه ...
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية

تعليق