شُغلتي انا عكس اتجاه حياتي
مهموم مجروح ودموعي ليلاتي
والاسم شُغلتي بين الناس مضحكاتي
اضحك في وشوشهم وأعيش مأساتي
وده حالي من ساعه لساعه يوماتي
لما أفضفض لازم يضحكوا من حكاياتي
ليه?? الظاهر نسيتم اني مضحكاتي
رسمت بالالوان على وشي اداري الهموم
ارسم الضحكه والعين ملبده غيوم
حياتي تمثيل نفسي اعيشها حقيقه يوم
حتى لو صحيت من حلمي ف الحقيقه مصدوم
الدمع في العين من حبسته سار سموم
امبارح زي النهارده هو هو وبكرى معلوم
لاعتاب عليكم والا شكوى والا هاقول مظلوم
حياتي بمرها اعيشها واضحك على نفسي
واجيب من الوانها لون اكحل عيني
واقول ياعيني نفسي اهرب من سنيني
وافرح ولأيام الحزن اشتاق ويزيد حنيني
انام تحت السما ف حضن القمر ونجمه تغطيني
واسمع ضحكه بريئه لهمومي تنسيني
وألآقي ايد تمسح دموعي لمستها تدفيني

مضحكاتي ومشتاق اقابل نفسي
في المرايا احاول اشوفها الاقي رسمي
واللي جوايا ليا وحدي بين الناس منسي
حزين يوماتي والفرحه عليا تعدي ماتمسي
وسفينة الحزن الوحيده في جزيرتي بترسي
قلمي من رمش ساقط
ومدادي حبر من زمانه ساخط
ولون وشي اسود باهت
والضحكه اللي في القلب ماتت
مضحكاتي والوظيفه مضحكاتي
والفرح سطر في كتاب حياتي
بين المشاهدين انا وسطيهم مُشاهد
ابكي من غير سبب لاني حاسس بالمضحكاتي
اللي كنت في مكانه يوماتي
لاعرفت اعيش زيهم واضحك ابدا ليوم مماتي
عشان كده انا من وسطهم راحل واعلن لهم تحياتي