( قولوا ليسرى وزيرنا ارحمنا )
فى ذكرى مهزلة كادر المعلمين المصريين
صدقوا وقالوا وزارة لئيمة
كل أفكارها موضة قديمة
يوم ما تفكر كيف تتمدن
ترجع لينا بألف جريمة
قولى يا هيما وقولي يا سيما
صحيح وزارتنا عديمة قيمة
قولوا ليسرى وزيرنا كفاية
سنتك سودة ما ليها نهاية
طالع نازل تسلخ فينا
وأنت وقاعد فى الضلاية
لو تسمح لى أقول لك حاجة
ظلمك غطى على الشمساية
حط الكادر لينا وقال
عايزين ننتج فى التعليم
ولا كفاه منصب ولا مال
ولا مؤامرة مع التعتيم
شاروا علينا ولاد الخال
رحنا ضربنا سلام تعظيم
دخلنا التست لقينا الحال
حال ما يسرش حتى بهيم
صدقوا وقالوا وزارة دمار
تشوف مناهجها تقول ده قمار
غيروا فيها لحد ما بقيت
كل علومها هزار فى هزار
حتى أفكارها ما عادت تنفع
ولا بتفهم حتى حمار
ضحكوا علينا وغموا عنينا
وحطوا عيالنا فى وسط النار
الله يخرب بيتك ياللى
ما عدتش تبغى فى مصر عمار
قولوا ليسرى وزيرنا ارحمنا
تستْ الكادر ديتى حطمنا
مين هيقولك أن أفكارك
مش تتناسب مع معظمنا
زمنك ولى... وزمنك راح
جملك عجز سِنَّة بسِنَّة
لو بيهمك كيف نتقدم
لِمْ عزالك وابعد عنَّا
لِمْ عزالك وابعد عنا
وسيبنا فى حالنا يا مجننا
شعر/ حمودة سعيد محمود
الشهير بحمودة المطيرى
عضو نادى الأدب بثقافة قوص
أعجبني
تعليق
