وهاتوا الشِعْر ع القهوه
وعازمُه عشان يكون ممنون
وهاخد حروفه على سهوه
واديله حِته م الأفيون
واسقيه قهوه من غير وش
ودبش الضمنه يخليه شيش
وف الشطرنج الملك يكش
على غفله ارص حشيش
ع الحجرين انا موَصِّي
لِ شَطْر الشِعْر وحروفه
واسقي حشيشي من قَصِّي
دا شبح الشِعْر من خوفه
ولِ إمتى يقولشي لفظ جريء
ويخاف من مَلِكُه ف (الشطرنج)
وساعة الحق يقوللي بريء
(فودافونه) دا وَيَّا (اورانج)
وساقطه شَبَكْتُه ف إتصالات
وقلت لإما حقنة بنج
لإما ب غزه ألقاه مات
عشان يعيشي تاني جبان
وقلبه ياعيني يبقى رُوهَيف
انا عَايزُه ب ناب واسنان
وانا اللي جِبته يتْكَيِّف
ويشرب شيشه بالراحه
ويلف سيجاره محشيه
واقوله كلامي بصراحه
ف ساعة الصبح وعشيه
هتاخد اجمل (الكورسات)
وتتمرن على التكشير
ف وش الفسده والبشوات
ولا تخافش رياح أمشبر
ف سَب الخلق لْ منافقين
إلبس عندك واتروشن
وهسَقِّفْلَك ع البوقِين
وعَلِّي ف صوتك وخَشَّن
ولا تهابش لِ طراطيرها
وسِب الديب وأسدها
دا نهبوا منها قناطيرها
وقالوا الغابه يافسادها
دا شِله ياشعر ما تبقيش
حراميه من الآخر
دا انا مكلف نفسي حشيش
عشان تشتملي الفاخر
وكاظم بيه وشَوَكَتَهُم
وناظلي وَيَّا شركس بِك
دا كِبروا قويه شُوكِتْهُم
ب تجْرَحْنا ف ساعة الشَك
وباشتهم امانه رُستم
وسيب محسن بتاع الفول
مهما يسب او يشتم
دا حق القدره لسه بيقول
ما سددتش منه جنيه
ودافع عن الحج احمد
اللي قال اتعبنا يابيه
وعِرق ف جسمي يتْجَمَّد
واقول للشطر هات عَبْله
وعنتر ساعده على البهوات
تقوللي الزَمْر ليه طَبْله!!!
اقول حاسبلي ع الطلبات