حكايات ع الساقيه
------------------
كان الفجر
يوماتى بيخبط
على بابنا
ببصحينا
تصحا الضحكة
قبلينا
تنده ع الشمس
اللى ساكنه
فوق السطوح
نشم ريحة الندى
ع التوته
تسبقنا أحلامنا
من غير فطار
نلقا النهار
شبابيك
والنسمة بنوته
بتلعب مع الفراشات
والضلة ضفاير فضه وفيونكات
حكايات ع الساقية
مفروشه
والساقية حدوته
ف ودان النخيل
بلحات
ويا خدنا غُنا العصافير
لحد باب الجنه
نعبِّى جيوبنا غُنا
ونحلم ونتمنى
ونرمى في عين الشمس
أحلامنا
عيل وفاكر ف السما
مطره ببرنيطه
والتانى مستنى
أمتى يشق الحيطه
وغيره
يحب اللمه والزيطه
وأنا لسه فارد جلابيتى
وف ديلها اخر حلم
بشريطه