منيش فارس
-----------------
منيش فارس كما الأحرار
بسيف بتار
بيهزم خوف محبينك
منيش زاهد ولا درويش
ولا بلبس هدومي خيش
عشان أقدر
اقيد ليكي قناديلكِ
أنا النجمه اللى مطفية
ومخفية في ليل صبرك
بنادي كل يوم قمرك بنورة
يملا وجداني
سؤال يجي على لساني
صحيح ينفع اشاور ليكي ع السكه
وانا معرفش عنواني؟؟!
انا ابنك
وفيكِ عشت متغرب
وتبعدني سنين حزنك
ألاقي قلبي بيقرب
ولو أملك سفينة نوح
راح أخدك فيها أنا وأهرب
دأنا الواقف على بابك
بناديلك يا محروسة
في ليل يوسف
تبات أحلامي محبوسة
ولا بملك عصا موسي
عشان بيها أغرق كل فراعينك
-------------------------------
من ديوان #بره_الدايرة
#ناصر_قورة