أنا مصراوي
أنا مصراوي إسأل عني
ربابة الراوي أو حتى الجني
أو إسأل عني إللي انت عارفهم
وإسأل حتى كمان بارليفهم
وقت الحرب أنا قمت بدوري
عبرت عبوري أسرت ياجوري
وكعب بيادتي غرز فى رقبته
فى عز الضهر فى وسط ديابته
أنا مصراوي الضربة الأولى
أنا اللى هزمت جارتنا الغولة
ورجعت بسينا ولا احنا نسينا
وإن كنا نسينا نسأل نفسينا
لسه بتسأل أبقى أنا مين
راح اقولك تانى ياغراب البين
أنا حصة شرح فى درس تاريخ
أنا شجرة قويه فى وش الريح
أنا أحمد نجم وشيخنا إمام
وكنيسة ومدنة وبرج حمام
عرفت انا مين أنا عم أمين
ومينا وحنا وعلى وحسين
ونديم وعرابي وزغلول وفده
أنا إبن النيل وإديا روافده
أنا شبرا وغمرة ومصر عتيقة
أنا صاحب صاحبي فى وقت الضيقه
أنا لمة عيلة فى ليلة العيد
عشاها الدقة وعيدها سعيد
على الله تكون عرفت انا مين
انشاء الله تتوب ياجهول الدين
دينا الواحة لكل غريب مع رحمة ونور على كل منيب
دينا سماحة ماهوش ترهيب أساسه الرحمة مش التعذيب
مافيهوش خرطوش مافيهوش مولوتوف
مافيهوش صواريخ مافيهوش جرينوف
فينا المذنب كل حياته وتاب لله فهداه لصراته
كلنا لينا رب نقف قدامه نترجى فى يوم العرض سلامه
سيبونا وحدينا للى خالقنا إحنا عباده وهو بارئنا
بقلم طارق السيد
