رسالة مهاجر مصري
محمد ضباشه
عشقتك قد موج غدرك
وعلي قد ما أنا شايف
وكان عمري أنا مهرك
لكن علي الضنا خايف
ما يبقي صبرهم زيي
وتسهي عننا وعنهم
وغربانك يشدوكي
وتنسي تقربي منهم
وتعلي الصرخة جوايا
وأقول فينك يا نسياهم
ياخدهم الغرق منك
وأنت عايشة جواهم
ويسيبوا في يوم حضنك
ويموت الحلم وياهم
ودمعي في العيون يرحل
مادام انت ما شيفانا
وموت الفقر دا أرحم
مادام أرضك ما شيلانا
وقلمي علي التاريخ يكتب
كنت انت اللي هجرانا
وناسية ولاد بطنك
وفي جوف الذل رميانا
ونور شمسك بعيد عنا
وخير ارضك ما عشانا
اه خف حملنا عنك
ومن قبري اقول انك
ما حسيتي في يوم بينا
وخاب في اللقا ظنك
