صرخه منى مش عتب
إشمعنا إسمى إللى إتشطب
عذبونا موتونا إحرقونا
وإجمعوا كل الحطب
إن هاجرت تقولوا خاين
وأموت غريق جوه البحور
وإن قعدت عليكوا هاين
وأندفن جوه القبور
من موت لموت فين الفروق
من كل العذاب لازم ندوق
إللى قاعد فيها ميت
أويرضى يعيش بين الشقوق
العداله فيها نداله
والظلم واضح ع الوشوش
وإللى عايشين الحساله
بضحكه صفرا يبقه باشوش
وإللى ركب الموج وعافر
كان حلمه يهرب أويسافر
أهو مات شهيد جوه البحور
يمكن تقولوا عليه دا كافر
مهو راح خلاص زمن الصحابه
وإللى مسكوها الديابه
والفقير أصبح فريسه
نهرب لفين محنا الغلابه
وإللى سرق الدولارات
تعرض عليه الصلح هات
وإن عطاك يبقه كريم
وإن رفض تعتبره مات
========================
الشاعر عيسى عبد الرؤوف
