داري العيون
داري عيونك ياصبية
أنا قلبي ضعيف
داري إعملي معروف فيا
أنا نجمي خفيف
آه م النحت إللي ف قدك
يالطيف يالطيف
ياما نفسي الورد إللي ف خدك
أقطفه تقاطيف
مين قدك مين إنت ياباشا
يابو خصر نحيل
حاشى وكلا و 100 حاشى
ولا قمر الليل
على مهلك قوي ياغزالي
بشويش بشويش
ريحني وريح يوم بالي
عشان أقدر أعيش
خطي الخطوة بحنية
ياأرق غزال
أغزل في جمالك ياعنيا
أجمل موال
أبدأه بعنيك العسلية
وأنهيه بسؤال
هتجيني ولا ياصبية
عاجبك دا الحال
أنا عاشقك ومسلم أمري
للوم اللايمين
وأفديك ياحبيب قلبي بعمري
ياسيد الحلوين
م الآخر كدا داري عيونك
بستاير رمشك وجفونك
فتنتني عيونك ياصبية
خبيها وإرحمي مفتونك
بقلم طارق السيد

التعليقات