#أبويا_مات

السنين مسروقة من عمرى
بعد موته إتخسف قمرى
كان بنوره وطلته هداية
في الظلام اللى ماله نهاية
كل يوم في سجودى بادعيله
كنت نفسي أموت أنا بداله
أصلي ياما بكيت على حاله
بس قدامه أبتسم وأكتم
قلت أشجع فيه وأنا أتألم
لما مات إسودت الدنيا
بس بردو وقفت مش خايف
قلت هاخد حقي ما هى فانية
وأعمل اللى أبويا كان حابه
فيه حاجات كان أبويا يعملها
لما مات مش ممكن أهملها
عاش حكاية طويلة فيها مواويل
كل موال فيه حاجة جديدة
فيها ضحكة وآه وتنهيدة
لما بفتكر الليالى معاه
والسعادة والسفر وياه
في الشتا تدفينا أحضانه
جوه بيتنا وإسألوا حيطانه
لما كان مليان كدة بنفسه
كان مالينا أمان كدة بصوته
فجأة بيتنا يبقي من غير روح
لما كان بيسيبنا ويسافر
هل هتمشي سفينة من غير نوح
كنا نغرق بيها ونعافر
يوم مايرجع رد فينا الروح
نفسي أشوف منه ولو ضافر
جملة بتصبر تداوى جروح
لأ مامتش أبويا دا مسافر
#أحمدعزت