على هامش الصفحه
كلام كتير مكتوب
حروف ع السطور سارحه
بتحكى عن لقا المحبوب
أول مره نتلاقى
وكانت يدوب نظره
فى عيون بتتشاقى
بتقول مستنياك بكره
واليوم مش راضى يمشى
وساعاته رجولها مكسوره
واعبى فى الأمل واحشى
وأتخيل فى دماغى الصوره
وفى المعاد اتقابلنا
والفرحه ملهاش وصف
حاجه بتربط مبينا
وغرام بيعصف عصف
حسيت ساعتها إنها كمالتى
وإنى مكونش من غيرها
لا أمى ولا اختى ولا خالتى
ولا حد هيقوم بدورها
كانت ضروره حتمية
متقوليش ومتعيدليش
الهوا هيا والميه
من غيرها مقدرش أعيش
ولسانى فلت منى
وقال كل الكلام
اياكى تبعدى عنى
بعادك عنى حرام
وبحملك المسئوليه
لو يوم مشوفكيش
وتيجى تدورى عليه
فى الدنيا متلاقينيش
ولسه على الصفحه
كلام كتير مكتوب
بيحكى عن فرحه
ورحله مع المحبوب
منير خاطر