بكره هاتعمل إيه

@@@@@@@@@

أه لو أسيب الدنيا وافوت

وادخل دغري ف قلب الموت

وأقعد أسمع من غير صوت

والقي الدنيا الزحمه سكوت

والقي الناس ع الارض كتير

والقي الفاسد والهلفوت

والقي الظالم جوه النار

واقف زي الفار مسخوط

يبكي ويصرخ من غير صوت

مين هايهز الأرض ساعتها

مين هايدور مين هايفوت

مين اللي هايقدر يرفع صوته

مين اللي هايقدر يعمل حوت

قول لي يا ظالم إيه هايفيدك

مهما كنزت ذهب ويا قوت

بكره نسيب الدنيا ونمشي

بكره المال والجاه هايفوت

بكره صحيفة عملك تطلع

فيها أدله وفيها ثبوت

شوف الذنب اللي انت جانيته

شوف كام تهمه وكام شلّوت

لما قدرت علي الغلبان

خد من إيدك كام نبوت

قول لي هاتعمل إيه يا مدهول

وانت هناك زي الكتكوت

نفسي أشوف اللحظه ساعتها

نفسي أتأمل ف الملكوت

نفسي اشوف للظلم نهايه

نفسي بجد الظلم يموت

@@@@@@@@@@

بقلم // طه إبراهيم

تعليق