بدأت أكتب وقلت
يا حروفى ساعدونى
قالت طهقت وزهقت
ونشف الدمع فى عيونى
الحزن مالى كلامك
فى حقيقتك وأحلامك
عمال تقول يوماتى
زهقان من حياتى
وتقولنا منشتكيش
وانته مبتخليش
وبتشكى رايح جاى
وماسك ربابه وناى
بتعزف لحن حزين
والخلق مش عاوزين
حد يفكرهم
بعزابهم وآلامهم
عاوزين كلام يفرح
ويهدى ويريح
وعشان اريح ضميرى
شوفلك حروف غيرى
واكتب زى ما تحب
كلام يوجع القلب
واروح انا لحالى
لواحد مرتاح وخالى
منير خاطر