كل واحد
جواه واحد
بيقول أيوه
وبيقول لأ
معاك كرهتو أو حبيتو
بس يا خساره
ميملكش فيتو
بيقول غلط
بلاش العبط
بيقول إمشى
فطريق الحق
بيقول حرام
بيقول تمام
أوقات كمان
منك يطق
لكن للأسف
معاهوش عصايه
ممكن تشوفو
جوا المرايه
ماسك فى إيده
جرس يدق
بينصح ويسكت
ساعات يلوم
ساعات يبكت
ساعات عنيف
ساعات يرق
أوحش حاجه
إنك تبيعه
ولو تمنه هيسد
للإبن جوعه
ومهما كسبت
البيع دا حرق
يقول حاسب
دا مش مناسب
مش كل حاجه
هيا المكاسب
مش كل حاجه
تيجى بالزق
يسيبك تهيص
طول النهار
تفرح وترقص
وتقول دا غار
بالليل تلقاه
على المخده
جايب معاه
شاكوش وعده
ويدق جنبك
على السرير
تقول انته مين
وجيت منين
أنا الحارس
أنا الغفير
أنا اللى بيسمونى
الضمير
منير خاطر