المفسديون
التلفزيون المفسديون
برامجه عجيبة ولها كذا لون
فكاهة تفاهة عته و بلاهة
هبل توك شو وفنون وجنون
إللي في يوم لبسته جنيّة
أو مندوه ندهته نداهة
يجي لشيخنا إبن الجنيّة
يشخشخ جيبه بكل نباهة
الآن إلى مطبخ أبلة مديحة
بتوصف وصفة لست سميحة
تحط البرفان ع الملوخية
وكسبرة ناشفة على التسريحة
وإعلان جامد قوي عن فيلا
إذا كان في مارينا أو ماربيلا
والمتفرج جاتله الحسرة
علشان بيته مبني من الجلة
وإللي يأبرش ويولعها
وإللي يحبرش ويوسعها
وإللي على فلانة مسكت ذلة
تيجي ع الهوا كدا وتطلعها
وإللي عايز في دماغه 100 قلة
علشان خد من جيبنا ماخلى
ومشهور جدا في الأوساط
إن سعادته حرامي الحلة
واد حريف قوي في التشويش
وماجيستير فن التهميش
وبعد الحلقة يقابل الشلة
حشيش وصبايا مع التحابيش
وإللي يجيب هيفاء في الصورة
ويقولنا حلوا الفزورة
وإحنا نقوله نبوس على راسك
خلي الصورة ياواد مستورة
خد هيفاءك وإبعد عنا
مش هنرن عليك ولا رنة
ونصيحة منا يابو الفوازير
لو شوفتنا يوم تهرب منا
والأفلام حسب الأهواء
الألماني شد الأجزاء
على كل القيم المصرية
صبحت بلد الواء الواء
آدي التلفزيون وعمايله
وادي كلامي ودا إللي أنا قايله
ولو شايفيني أنا واد مجنون
يبقى جناني محدش طايله
بقلم طارق السيد

ت