حد فاهم حاجه
*****
حد فاهم حاجه
الفلاح عاملى خواجه
قلع الجلابيه ولبس برانيط
وماشى يتنطط تنطيط
وعا النت قاعد وعامل نتيت
قال يعنى خلاص بقى فهيم
وابو العريف فى التعليم
لو قلت له ما تشوف ارضك
داكانو بيقولوا ارضك عرضك
رد عليه سكتنى كلامه
وبدا يشكى لى كل الامه
ماعادتشى بتاكل عيش
اخر السنه وكانه مفيش
المبيدات سعرها نار
والبنزين ويا السولار
والواحد فينا بقى محتار
انت مش فى الدنيا معانا
دا فيه ازمه فى الدولار
طول السنه ايدينا فى الغيط شغاله
شغل بجد مش شغل عواله
ولما يجى معاد المحصول
على الباب نلقى مليون غول
حق الدوا والكيماوى
والا كسوة العيال
وما تنساش حق البقال
وكمان فواتير الكهربا
كل شهر لينا معقربه
حتى الميه بقت شهريه
دا غير طلبات الوليه
حتى الدروس الخصوصيه
كل شهر بكام ميه
والبت عاوزه جهاز
مطبخ وتنجيد وقزاز
والا اسيبها يميل بختها
دا لسه وراه كمان اختها
والواد عاوز شقه ومهر
والله يا ابنى دا كسرة ظهر
حط نفسك حبه مكانى
وقولى بقى راح تعمل ايه
فلاح ايه قولى يا بيه
هو حد حاسس بيه
والا بيسأل مره عليه
دا انا احسنى اكون طبال
حا تمشى العيشه وتبقى عال
حا اخد نقطه مع البقشيش
والا اعيش ع التهبيش
قولى اذاى عاوزنى اعيش
*********
على حافظ

تعليق