في حوارى النفس ياما
ألف غُصة و ألف جرح
كلها طالبه السلامه
كلها مكبوسه ملح
والجراح م الملح تدبل
بس طبع الملح حامى
لما تهت قالولى اسأل
عن معاني للأسامي
إسم محروم من صفاته
وإسم مش مفهوم له معنى
إسم مقطوع من صِيلاته
ونأب شابك فيه جمعنا
وإسم ممنوع اختلاطه بأي اسم لأنه خان
وإسم متداري في صُحبه
عشانه م الأول جبان
واسم صاحبه لاغاه بكُونيه
أصل غاوي صيت وشهره
رش اسمه بالكولونيه لما فكر ياخده سهره
وإسم خايف يبقى وحده
وإسم نايم جوه لحده
وإسم شايع ليك بتاخده فى آى حتى أو مكان
واسم مبسوط من حروفه
عشان إيقاعه بسيط وراقص
وإسم مخنوق من ظروفه
كل حاجه
ده اللي ناقص
وإسم مش راضي بنصيبه
و ع الأسلامى التانيه باصص
واسم مش مهموم وهايص
رغم جرحه
سعيد وعايش
واسم جوه دموعه بايش
لأن له قلب وحَسيس
واسم تتلخبط في لونه
لأنه بين الناس خَبيس
واسم محبوسه في عيونه
الأماني عشان حبيس
واسم تانى
واسم تالت
والتداول عرف ثابت
مهما لاموا الناس وعَابت
للأسامى أكيد وريث