فات الوقت
ماتسألنيش عن إللي فات
ماتقيدش نار الذكريات
إسأل نفسك بإللي في نِفسك
بالنسبة لي دا ماضي ومات
ولا أقولك أنا راح أجاوبك
بس إجابتي هتجرح قلبك
لاهترضيك ولا هتهنيك
إذا كان لسة فيه نبض في قلبك
إستغنيت بك عن كل التاس
وهبتك قلب ماليه الإحساس
وبقسوة قلبك دوست عليه
وأنا عمري ما قلبي في يوم انداس
ليه تشرب كاسك بدموع عيني
وكاسي بمرك ليه تسقيني
والمواعيد إللي كانت عيد
كانت تإلمني وتشقيني
علشان كنت أنا بستناك
كان كل إللي بيشغلني رضاك
وإنت ياتتأخر يا ماتيجي
كأنك بتمنّ بلقياك
كان تعذيبي سر سعادتك
وإرادتي المرهونة بإرادتك
أنا مابقولش الحق عليك
الحق عليا أنا إللي هاودتك
فات الوقت ليه جاي دلوقت
بكل غرور وفاكرني إشتقت
حقيقي إشتقت لأيام قبلك
قبل ماكنت ف همّي بدأت
وبعد الهجر وبعد الغدر
جاني نصيبي ف صورة بدر
جاني بوعده جاني بسعده
وشالني ف نن عيونه الخُضر
فات الوقت خلاص شرّقت
بعد ماغرّبت سنين في هواك
قُصر كلامي خلاص أنا فوقت
من وهم كبير عشته أنا وياك
بقلم طارق السيد
أعجبني
