حلق حوش
حلق حوش بهوات بكروش
وسيجار كوبي وذمة فشوش
خد مورد جيب منفوش
حوش حوش حوش حلق حوش
في جوازة نجل فلان تلاقيهم
يلمعوا هما وكل زويهم
يرقصوا صامبا وتانجو و رومبا
وفالس وصلصة رقص أبالسة
حوش حوش حوش حلق حوش
هوانم لابسة أغلى الفساتين
ألا مود من جلد البني آدمين
فوق الركبة بعشرين سنتي
محزق قوي كده ع الجنبين
حوش حوش حوش حلق حوش
هوانم راسمة عيون ورموش
وشوش إللي محليها رتوش
بالكم بس يشيلوا الزينة
تعرفوا إيه هو الفنكوش
حوش حوش حوش حلق حوش
أحلى سلام للطبقة العليا
وأحلى سلام لعقول منخوليا
كاظم بك مع صافيناز هانم
والأنجال سي ميشو وجوليا
بقلم طارق السيد