المنسى
صحيت لقيت نفسى
فى ارض تانيه مش ارضى
وفى المرايا بصيت لقيتنى.... كده ؟ محنى
وشايل حمل تقيل على ضهرى
وطريقى كله شوك ودم على جفنى
اصلى بانام باكيان على ولدى
ومره تانيه انام ودمعى على خدى
من حكم ظالم عالى من بلدى... مشيت اجرى
فى الشوارع ادور على اصحابى
لقيتهم بالعصى بيضربوا كل احبابى
وكل اللى يرفع صوته يحسبوه خاين
وكل اللى يقول امين يعيش هنا امن ...ورحت اجرى
على بيتى وخبطت على جبرانى
خرج لى واحد ماعرفهوش
وماسك بندقه خرطوش
ومن خوفى سألنى ؟ سؤال مفهمتوش ....طلعت اجرى
على السلالم ودخلت شقتى مرعوش
وعلى لسانى بقول يارب حوش قعدت ابكى
وسالت دموعى بحرقه على خدى
فقير غلبان وقبل الثوره كان منسى
وقف فى الثوره وكان انسان ومن جنسى
وبعد الثوره وقف وقال يا نفسى
ونسى فقير غلبان انا الانسان انا المنسى

بقلم/عصام سعد زغلول