تعالى نقعد هنا على جنب
وقطع لنا شقة بطيخ
ناس تدفع دولارات فى البمب
وفلوس بتحرقها الصواريخ
والناس ياعينى ملهاش ذنب
الصوت فودانها زى السيخ
الواد بنجيبله بالدسته
علشان يقرف كل الحته
وكل دقيقه نسمع طاخ طيخ
ونقوله يخرب بيت اهلك
واللى جابلك واللى باعلك
ونسب ونلبخ تلبيخ
والبمبه تطير للواد عين
ونحتار نجرى بيه على فين
طنطا وللا كفر الشيخ
فين العيب منقدرش نحدد
فى الحكومه وللا المستورد
وللا بياع النفافيخ
يشتروا الدولارات بالغالى
ويستوردوا بفلوسنا تسالى
والصين تطلع للمريخ
نشحت الفلوس م الغرب
ونستحمل على راسنا الضرب
ونجيب بيها م الصين شخاشيخ
قلة عقل ياناس وضمير
وناس بتغرقنا فى البير
علشان تتأنتخ أنتيخ
لو رجعوا جدودنا الفراعين
هيقولوا علينا مجانين
وينزلوا فينا توبيخ

منير خاطر