ما بين الضله والشجرة
==============
انا ابه مش عارف
انا قاعد انا واقف
انا راضى انا خايف
انا اعمى انا شايف
انا ايه مش عارف
يتوه الحرف من صوتى
يشبط ف السكوت موتى
ويوم ما الشمس تندهلى
وترمى الكحلة فى رموشى
يدوس الليل على كاهلى
وينتف شمسى من ريشى
لا انا عارف للسما سكه
ولا قادر على ضحكه
ترسم فضا لجناحى
والاقى النسمة تسبقنى
ترش النور لصباحى
انا المقسوم
ما بين الضله والشجرة
وانا العريان
فى عز البرد والمطرة
بس الحلم جوايا
شايل غُنا بكره
ويلعن ذلى وخضوعى
ويمسح م الفضا دموعى
ويرسم كونى من تانى
والقا السما حضنانى
وتهدينى م النجوم زهرة
وتتمايل ضفاير الورد
وتتعايق بلون الخد
اه يا حلم نسانى
جرح الحبيب
بقَى ذكرى
=====================
كلمات الشاعر : سليمان صالح احمد ( سليمان خطاب )
أعجبنيإظهار مزيد من التفاعلاتتعليق
