ساعات القلب يستسهل
ويتطوع كده بإجابات
ويبقى سؤالى متهدل
من الحيطة بركن الذات
فيتكعبل وجع مركون
وروحى تروح لآخر الكون
وترجع لي بألفين لون
وعيد تاني بها الحسابات
وأشوف الأمر جد خطير
وعاتب روحي ع التدابير
وحرض قلبي ع التغير
وأشاور عند للنهايات
ساعات دقاته تتلخص
في نظرة حاضنة تنهيدة
تشوفه تقول دا بيخلص
وهو الحكم تأبيده
لكن من شوقة بيفرفر
في وقت الحلم مش أكتر
يكون حادق
يكون سكر
بكون محتاج لتأييده
وبرده ساعات بيتجلفن
عشان العط والصدمات
وببقي أنيق ومتسلفن
عسل جدا تقول شربات
هو القلب له مواويل
وله في اللت والتقويل
وله في المط والتعليل
وكام حاجه وفوقها حاجات
،
‫#‏عادل_عوف‬