ميغركشى شكل ولون
ومظاهر حلوه وخداعه
بص الأول ع المضمون
التاجر بيحلى بضاعه
مش كل جميل ووسيم
بتكون العشره معاه حلوه
مبيبقاش من جوا سليم
وتبقى جبت لنفسك بلوه
اوعى تقع من أول نظره
وتفرفر وتقول دوبت خلاص
وللا تغشك ضحكه حلوه
لحد الفاس متقع فى الراس
ياما ناس نقصاها وسامه
ومن جواها زى الفل
وناس تلقاها جمال وقيامه
وعيشتها تمرض وتعل
إدى لنفسك دايما فرصه
قبل ما تحكم كدا ع الخلق
مش كل واحده عاوجة القصه
تلاقى قلبك مدلوق دلق
مترجعش تقول كانى مانى
ادينى نصحتك وانته حر
ومتسمعنيش كلمة آه يانى
لساك يا اخينا على البر
منير خاطر