لسه بتلعبوا لعب الحاوى
وتقولوا علينا الشعب النامى
بتحاصرونا بره وجوه
مره شيطان ومره مخاوى

ياللى بنيت بالنهضه السد
ياللى ورانا كفايه إتهد
كل الشعب واعى وفاهم
بيقول عليك مواويل وحكاوى

مانع العمله تخش بلادى
وتقول عنا كلام مش عادى
بتبث السم وف إعلامك
حتى كلامك ماهوش متساوى

على أوباش طبعاً بتراهن
وبكدبك تصنع كل براهن
مش مرتاح طول محنا ف لحمه
على تقسيمنا أصلك ناوى

رافض ليه طب لينا وانيس
بتوقعنا ليه فى باريس
علشان رافضين التابعيه
طب مناش غير سيسى رئيس

مش طياره تهد علاقات
هات من عندك تانى وهات
لسه فرنسا وروسيا معانا
وإنتوا عقولكوا ف التهييس

لابرادعى ولاصباحى
شعبنا فاهم واعى وصاحى
كل دول أوراق محروقه
دول مجانين ولبسوا قميص

طبعاً عايز إبن سانيه
ويساعدوك دعم الشرعيه
دول قابضين تمن خيانتهم
دول شياطين وإنت إبليس

مش عايزينك نوعنا سلاحنا
مش هنعود لومره سامحنا
ومش هنمد إيدينا لحد
لو كان خاين أوحتى خسيس

مش هنطبع ولاهنميل
لبنى صهيون أوقطرائيل
لازم نعدى كل الصعب
محنا أبطال ومعانا رئيس

كل أحضان إخوانا عروبه
بينهم دويله مش مطلوبه
زى القهوه من غير وش
صايصه وخاينه ومش مشروبه

=====================
الشاعر المنلوجست عيسى عبد الرؤوف