الحنّه ضفاير نور
===============
تجرى السنين على وشك
تتكرمش
تلم الضحكة من صوتك
تشوف موتك
بين الرمش والننى
تعبى العتمة ف جيوبك
تخاف الخطوة من يومك
يتوه الحلم من نومك
وبين الجلد وهدومك
تبات مكسور
وجوَّا النبضه اللى ف الأخر
تجرى عليها ما تتاخر
وتتمدد على الاخر
للحظة صمت بتهاجر
بين الشقوق محشور
مع ان النسمة بتغنى
على جناح عصفور
ولسه الفجر مستنى
نقش الندى ع السور
كف السما متحنِّى
والحنّه ضفاير نور
لو شاب العمر منك
لسه فى صوت الغُنا
تغريد
افتح بيبان الأمل
لساك فى دفتر المواليد
---------------------------------------------------
كلمات الشاعر : سليمان صالح احمد ( سليمان خطاب)

تعليق