هاستناكى

غربة و طالت
دمعة و سالت
فات العمر و لسه بنحلم
يوم نلقاكى

هاستناكى
هاستناكى سفينة و شط
لعب الأولة و عوم البط
نطلع فوق الفرع المايل
فوق الترعة
ايدى ف ايدك يلا ننط
شدى بايدك طرف الشبكة
تعمل غمزة
تطلع سمكة
تطلع ضحكة
و الغمزة ... تظهر ف خدودك
و انتى ف جودك
مالك زى
يلا تعالى نروح المولد
الله حى ... الله حى
و انتى معايا
قلبى ف جوفى بيرقص رقص
امشى و كل الناس بتبص
هاتى عصايتك
وادى عصايتى
و احنا معانا الطبل البلدى
قول يابو عوف ...
خد حبيبى بدر منور....
بدر منور
اما الضحكة زى السكر .....
زى السكر
لما بيضحك تلقى الضحكة ....
تلقى الضحكة
شمس ف عز الليل بتنور......
ليل بتنور
اوعى تقولى
نروح الدار
مانتى الاهل و... انتى الدار
و احنا القلب اللى بيهواكى
لسة ياغالية قاعد باحلم
........انى معاكى
بحلم بيكى نسمة و ضلة
مية و غلة
عود و كمان
بحلم بيكى جبين عرقان
بحلم بيكى بلال بينادى
كل ادان
و اسمع صوت الطير الشادى
ويّا ظهور الفجر النادى
ابنى مدينتى
تحت جناحك
اجمع زرع الخير ف براحك
و انسى العمر المر الباكى
هاستناكى
مهما البعد ما بيننا يطوّل
هاستناكى
مهما الظلم بكيله يكيّل
هاستناكى مرسى و مينا
ويّا حمادة و شادى و مينا
يمكن يوم تفتكرى وشوشنا
و تضمينا
حلم و تايه تحت سماكى
................... هاستناكى