عيب يا أبو حميد

بقلم

أسماء الد سوقى

دخلت مطعم مفتوح جديد عشان أجربه لأنه الوحيد فى وسط المطاعم الموجودة بيدبح حلال , أول حاجة شدت انتباهى الكراكيب وناس كتير واقفين مجموعات وصوتهم عالى وفجأة لقيت راجل كبير وقور واقف فى وسط المحل جاى ناحيتى وبيقولى أهلا يا أختى أعرفك بنفسى أخوكى أبو حميد وحضرتك قولتله أختك بنت الشاطئ قالى طب يا ترى الوالد ( الشاطئ يعنى ) شرعى ولا .......... عشان ده كان عامل مشاكل قولتله شرعى يا افندم قالى طب تحبى تاكلى ايه احنا عندنا حرية فى اختيار الأصناف وعدالة فى الحساب قولتله يا افندم ده من سعدى ,  بس أحب أعرف الناس دى مين وصوتها عالى ليه قالى قصدك النوايب دول مساكين كانوا محبوسين طول عمرهم فى البدروم سنين طويلة ومحرومين من الكلام عشان كده أنا بحب أسيبهم ياخدوا راحتهم ومن وقت للتانى بحب أشجعهم بالتصفيق الحاد لرفع معنوياتهم قولتله طب وبيخدموا الناس امتى قالى لأ احنا المهم عندنا راحة النوايب فى المطعم والناس مش هتموت لو استنت ولازم يعرفوا ان الأصناف هنا إجبارى بس بما لا يخالف شرع الله قولتله يا افندم سيادتك لما استقبلتنى قولتلى الأصناف براحتك حضرتك كده خدعتنى قالى لا يا أختى ده نيو لوك فى الإستقبال عشان نواكب العصر وهنظبط الطبخة ونوريكوا عمايلنا وتاكلوا وتدعولنا قولتله طب ممكن أدعيلك من غير ما آكل قالى اتفضلى يا أختى , قولتله إلهى ربنا يرزقك بحج فى عبارة منتهية الصلاحية وتموت غريق أو يبتليك بعصابة بلطجية يدخلوا عليك وانت نايم يضربوك ويسرقوك وانت وحظك يا تموت يا تعيش كفيف قالى بس كفايا أنا حاسس انك بتدعى عليا وشكلك مشاغبة وثورجية وعشوائية وممكن أجيب الحكومة تشيلك لأننا هنقضى على العشوائيات قولتله لا يا افندم حضرتك فهمتنى غلط ادينى فرصة أفهمك بما لا يخالف شرع الله حضرتك لو مت غريق هتبقى شهيد وأهلك هياخدوا تعويض عشان يسكتوا ونحط اسمك فى أى شارع ولو عشت كفيف هتبقى بطل وتاخد تعويض ومرتب بالميت تلاتة جنيه يعنى الدعوة كلها منافع يعنى أنا هعلمك ده انت أستاذ ورئيس قسم فى التقسيم وتوزيع الأدوار , قالى على العموم شرفتى ولو انك اتكلمتى من غير ما أديكى الكلمة لأنك مش نايبة زى الإخوة بس مش مشكلة هبقى أحذف كلمتك من المضبطة بتاعت المطبخ والمرة الجاية لما تيجى انتى والأخوات تبقوا متوضيين وقبل ما تدخلوا تقولوا دستور يا اخوانا وهتلاقوا مدير جديد انما إيه مفاجأة بنحضرها للزباين من فترة وياريت تغيرى اسم الوالد وتسمى نفسك بنت الشاطئ الشرعى عشان نقدر نتعامل معاكى قولتله يعنى أنا مش هاجى زى حبايبك المعسكرين هنا من فترة ومغيروش حاجة ما تخلينى ساكتة يا أبو حميد وعيب كده .

أعتقد إن الصنف الجديد هيبقى كبسة !