طريقة عمل بابا نويل " سانتا كلوز "

كل سنة وانتو كلكو طيبين وبخير ويارب السنة دى تكون احسن من السنة اللى قبلها واللى قبلها واللى قبل اللى قبلها :)
استحالة إن رأس السنة تعدي من غير ما يكون بابا نويل موجود، بس إيه رأيك السنة دي لما تعمليه أنتِ بنفسك وتستغليه في تزيين شجرة عيد الميلاد، أو تعلقيه في أي جزء في البيت.

•    كورة بلاستيك صغيرة "وش بابا نويل".
•    كورة بلاستيك صغيرة "جسم بابا نويل".
•    كورة أصغر منهما لونها بيج.
•    زرارين باللون الأسود.
•    قطن .
•    مسدس شمع أو صمغ.
•    قطعة قماش لونها أحمر.

1- الصقي الكورتين البلاستيك الصغيرين فوق بعض بمسدس الشمع.

2- الصقي القطن على جنب من جوانب الكرة اللي فوق، بحيث إنه يكون ده وش بابا نويل وسيبيه حوالي 1/2 ساعة علشان القطن يثبت على الكورة.

3- بعد كده الصقي الزراير مكان العينين على القطن من فوق.

4- الصقي الكورة الصغيرة اللي باللون البيج مكان المناخير.

5- أحضري القماش الأحمر ولفيه على الكورة اللي تحت والصقيه وحطي على الأطراف من تحت قطن علشان يبقى زي لبس بابا نويل.

6- أحضري قطعة كمان من القماش الأحمر ولفيها على شكل قرطاس، والزقيه علشان ما يتفتحش وبعدين حطي على الأطراف شوية قطن أبيض عشان يبقى زي الطرطور اللي بيلبسه بابا نويل.

7- بعد كده الصقي الطرطور ده على الكورة من فوق "رأس بابا نويل".

8- ممكن تخرمي الطرطور من فوق وتمرري منه دوبارة وتعلقي "بابا نويل" في شجرة عيد الميلاد، أو ممكن تحطيها في أي مكان عندك في البيت تضيفي بيها شكل جديد.