عسلية بالإنجليزي...

السلام عليكم... كالعادة كل يوم في حياتنا بيحمل شيء مختلف.. ممكن ابتسامة غضب أو دموع فرح.. ولكن لما توصل الدهشة لدرجة إنك مش عارف إيه اللي بيحصل، أكيد بتشعر وقتها إن فيه حاجة غلط.. في الوقت ده بيكون قدامك اختيارين.. يا ترى تعرفهم...

نقلا عن أحد أصدقائي المقربين اسمعوا هذه القصة العجيبة والتي حدثت له في إحدى وسائل المواصلات..
إيه اللي حصل؟..

كان راكب مع والده إحدى وسائل المواصلات المستحدثة على بلدنا المصون وهي الأتوبيس المكيف... الأتوبيس ده على الرغم من سعره العالي إلا إنه بيجتمع فيه جميع طوائف الشعب... من معلم الخضار وحتى المدير العام.. نفس مبدأ معاك قرش تساوي قرش.. معاك فلوس تقدر تركب.. المهم صاحبنا ركب هو ووالده الأتوبيس.. كان هادئ ومفيش حد واقف أو حد بيزنقك أو حد بيضايقك ودي إحدى مميزات هذا النوع من الأتوبيسات...

التليفزيون شغال والناس ساكتة وفجأة وقف الأتوبيس علشان يركب أحد الركاب.. حتى الآن كله تمام..
طلع شاب مهندم لابس قميص وبنطلون بيدلوا على ذوق رفيع شايل في إيده شنطة...

عادي مافيهاش حاجة.. اللي مش عادي بقى اللي حصل أول ما طلع... "لاديس أند جينتيل مين Ladies & Gentlemen" طبعا الناس انتبهت... السواق بكل ذوق قفل التليفزيون علشان التشويش على كلام الراجل المهم...

"آي هاف أ سيربرايز إن ذيس باج I have a surprise in this BAG"
طبعا الانتباه زاد... ده ساحر ده ولاّ إيه.. إيه اللي بيحصل ده.. طبعا كلام الراجل بالإنجليزي وشكله المحترم لغى أي شك في إن الراجل ده بيهزر.. وفوق ده كله تعبيرات الراجل اللي كانت تحسسك إنك بتتفرج على التليفزيون.. وبعد محاضرة بالإنجليزي والإحساس اللي تولد عند الناس إن الراجل ده أكيد هيخرج شيء لا يصدقه عقل.
خرجت العسلية... طبعا موجة هائلة من الضحك العاصف.. كل الأتوبيس تقريبا كان فطسان على روحه من الضحك..

ده غير واحدة تقريبا كانت شبه مخنوقة من كلامه بالإنجليزي لأنها قالت له... بقى إنت قاعد تتكلم كل ده وتعمل اللي عملته ده علشان عسلية... طبعا الناس مافهمتش الراجل ده مين ولاّ بيعمل كده ليه... المهم إن الراجل ده باع عسلية تقريبا لأغلب الركاب إن لم يكن كلهم... تخيل اشتروا منه العسلية... وحتى الآن ماحدش يعرف مين الراجل ده.. وعمل كده ليه.. يا ترى دي حركة دعاية من إحدى الشركات "بس ماسمعناش احنا عن شركة تنتج العسلية"..
ولاّ هو راجل غني والحال ضاق بيه واضطر يبيع عسلية وهي دي الطريقة اللي يعرفها...

ولاّ يا ترى ده واحد بيهزر.. ماحدش قدر يعرف.. المهم إن الراجل كسب وباع العسلية..

وكل عسلية وإنتم طيبين...
تحياتي...