.....
.
أنا متفوق فى الدراسة وبحب المذاكرة هدخل علمى !
وكمان من وأنا صغير نفسى أكون دكتور ,, هدخل علمى علوم !
لأ علمى رياضة علشان أطلع مهندس زى أخويا الكبير وكمان أنا بستمتع بحل الرياضة !
بس أنا برضو بحب الأحياء يبقى خلينى فى علمى علوم علشان أدرسها !
بس علمى محتاج مذاكرة كتير ومجهود أنا مش هقدر عليه والتنسيق بيبقى عالى يعنى بعد ما أذاكر وأتعب مش هعرف أدخل كليه كويسة خلاص أدبى أحسن !
بس أنا أصلاً مبعرفش أحفظ ,, مش هعرف أعمل حاجة فى مواد أدبى !
يبقى خلينى فى علمى ولو مجبتش مجموع كويس أبقى أدخل الكليات الأدبية من علمى !
ممممممم طيب علمى رياضة ولا علمى علوم ؟؟ مش هتفرق بقى ,, بس هما بيقولوا الرياضة صعبة يبقى خلينى فى علوم أضمن !
دة بيكون محور تفكيرنا كلنا وإحنا داخلين ثانوية عامة بس المشكلة إن كل الحاجات اللى بنبنى عليها تفكيرنا بتكون مش صح ,, يعنى مفيش حاجة إسمها علمى صعبة وأدبى سهله ,, ومش علشان خايف من صعوبة مادة أحول مسار تفكيرى 180 درجة ,, ومبدأ مبحبش الحفظ فمش هدخل أدبى ,, مين قال إن مواد علمى مش محتاجة حفظ ؟؟ ومش صح إنك تبدأ تفكيرك بإن التنسيق عالى أو الإمتحانات هتكون صعبة وإنك مش هتوصل للى عايزة حتى لو ذاكرت !!
خلونا نعرف مع بعض أيه هى خطوات التفكير المنطقى فى تحديد إتجاهك فى الثانوية العامة :>> ( أيه الكلام الكبير دة #أبسطهالك
1-أول وأهم حاجة لازم تكون عارفها هى المواد اللى هتدرسها فى حالة إنك إخترت علمى أو أدبى ,, وتشوف ميولك متجهه لأيه أكتر يعنى بتحب دراسة المواد العلمية زى الأحياء والجيولوجيا والفيزياء والكيمياء يبقى علمى علوم ,, لكن لو بتحب الرياضة جداً وعارف كل فروعها كويس وبتعرف تفكر فى حل المسائل الرياضية إلى جانب برضو الفيزياء والكيمياء يبقى علمى رياضة ,, لكن لو ميولك أدبية وبتحب دراسة التاريخ والجغرافيا والفلسفة والمنطق يبقى أكيد هتفكر فى الإتجاه الأدبى .
2-مهم جداً إنك تكون مستعد تكمل حياتك ودراستك كلها فى الحاجة اللى إخترتها لأن الكليات هتكون بتكمل نفس الدراسة سواء العلمية أو الأدبية فهتلاقى نفس المواد هى هى بس بتتوسع معاك أكتر كل ما تكبرli
3-لازم تكون محدد بالظبط الكلية اللى عايز تدخلها ؛؛ ودة بيتحدد بالدراسة فيها ومجال العمل بعد ما تتخرج مش مجرد إن كليه مستقبلها مضمون أو الخريج منها بيكسب كويس لأن دى هتبقى مرحلة حياتك اللى بعد الدراسة كلها ,, يبقى تبدأ لو مش محدد كلية معينة تعرف كل الكليات وتعرف معلومات عنها وعن دراستها ومجالات شغلها بعد التخرج وتشوف إنت نفسك تدخل كليه أيه وتحط دة هدف قدامك تذاكر علشان توصله بعيداً عن التنسيق وصعوبة الإمتحانات أو أى ضغوطات خارجية وبناء عليه تحدد إذا كنت هتدخل علمى ولا أدبى .
4-مبدأ مبحبش أحفظ دة تشيله من تفكيرك خالص لأن الحفظ موجود فى كل المواد بإختلاف النسبة لكن طبيعى إنك هتكون فى مذاكرتك محتاج تفهم وبعد كدة تحفظ علشان تقدر تسترجع المعلومة من ذاكرتك فى الإمتحان ,, ولو خايف من نسبة الحفظ فى المواد الأدبية علشان أكتر فتقدر تلاقى طريقة تسهل بيها على نفسك الحفظ يعنى تعمل التاريخ حكايات والفلسفة نقاشات والمنطق نظريات والجغرافيا متاهات وخرائط ذهنية كدة يعنى
5-إوعى تدخل حاجة علشان تبقى بتهرب من حاجة تانية ,, وإوعى تسمع لكلام الناس إن فى حاجة صعبة فتحاول تتجنبها لأن قدرتك فى الفهم والإستيعاب تختلف عن قدرة اللى بيديك النصيحة إنت أكتر واحد عارف نفسك وتقدر تقيم قدراتك وميولك
6-تفكير إنك تدخل علمى علشان مش هتجيب مجموع فى أدبى علشان قدرتك على الحفظ مش كويسة ولو جبت مجموع عالى يبقى كويس جداً أدخل كلية عملية ولو مجبتش مجموع هبقى أدخل الكليات الأدبية من علمى ((STOP)) لازم هنا تعرف معلومة مهمة جداً وهى إن تنسيق الكليات الأدبية من علمى بيكون أعلى بكتير من أدبى يعنى الكلية الأدبية اللى ممكن تدخلها من مرحلة أولى فى أدبى ممكن متلحقهاش فى مرحلة تالتة فى علمى ,, بلاش تفكير متحايل
7-لازم تفهم إن مفيش حاجة إسمها كليات القمة وإنك لو مدخلتش حاجة منها تبقى فاشل ومنجحتش فى دراستك ,, إنت اللى بتحدد حدود قمتك وبتوصلها إنت ممكن تدخل علمى وتجتهد وتجيب 99.9 % وتدخل كلية من كليات القمة ومتعرفش تنجح فيها وتلاقى دراستها صعبة وتقديراتك كلها مش كويسة وقتها هينفعك إن الكلية فى تفكير الناس إسمها كلية قمة ؟؟ فى حين إنك ممكن تدخل كلية بتآخد من أقل مجموع فى الثانوية وتتفوق فيها وتطلع الأول على دفعتك .. أيه الأفضل بقى قمتك ولا قمة التفكير السطحى wi
8- آخر حاجة بقى متآخدش قرار بناء على التنسيق أو إحتمالية صعوبة الإمتحان لأن دى كلها حاجات فى علم الغيب إنت كل اللى عليك تحدد الحاجة اللى بتحبها ,, تحط هدفك قدامك وتشتغل عليه إنما الباقى دة مينفعش يكون فى مجال تفكيرك أصلاً لأن التوفيق أولاً وأخيراً بيكون من عند ربنا وتأكد إن تعبك مش هيروح عـ الفاضى حتى لو مدخلتش الكلية اللى حلمت بيها فأكيد هيكون ليك حاجة أفضل فى مكان تانى "علينا السعى وليس علينا إدراك النجاح" .
قولنا بقى...
#انت_علمى_ولا_ادبى ؟؟؟
ساحة النقاش