مادة جميلة وسهلة باذن الله

 

كتاب واحد كبير احتمال يخفضوه وكتاب عملى وكتاب اسئلة

سعرهم 150 جنيه ^ _ ^

الروند شهرين
:::::::::::::::::::::::::::::::::::::::::::::


نظام الروند ...

الاسبوع ليه جدول بيتقسم على
*يومين فى العيادة الخارجية
*ويومين فى القسم
*ويوم فى مستشفى فاروق
*ويوم فى مستشفى المواساة

الاماكن :
*العيادة الخارجية : مع قسم الحروق جنب مدرج 3و4
*القسم : قسم الرمد فى مبنى الجراحه الدور الرابع
*فاروق او مستشفى الرمد : ورا استاد الاتحاد السكندرىبندرس ايه فى الروند:
بداية روند الرمد ليس له نظام البته (حلوة البته دى ) يعنى فوضى
مفيش جدول محدد ليه
يعنى المعيد يدخل واحنا غالبا اللى بنقوله يشرحلنا ايه
النظام : ان المفروض المعيد بيدخل يشرحلنا شويه وبعدين دكتور كبير يدخل يكمل

وللاسف مفيش تنسيق بين الدكاترة

افتكر ان فى 3 دكاترة شرحولنا نفس الموضوع


هو فى اول الروند حيشرحلكم الكتاب العملى الصغنن والمفروض انهم يخلصوه فى اسبوع طبعا بتاخده نصه كده فى الاسبوع الاول بسبب عدم التنسيق برده لان كل دكتور بيعيد اللى التانى شرحه ,


بس خلال الروند كنا بنخلى الدكاترة يكملوه

الكتاب الصغير ده بيسموه كتاب الشيت

ملحوظه : الشيت ده ورقه بيكون فيها اسم المريض وبياناته وال history اللى بيتكون من شكوى و present history و past history وبعدين الفحص لكل اجزاء العين ومحطوطه فى جدول هما هيدكم ورقه الشيت دى علشان تصوروها ودى حتستخدموها لما تيجوا تاخدوا شيت من العيانين .

كل مجموعة وحظها بقى فى المعيدين


احنا كان حظنا مش كويس بصراحه ,
المجموعة اللى معاها د.عمرو تبقى محظوظه دكتور شرحه ممتاز وفاهم احنا عاوزين ايه وشرح المنهج كله تقريبا للمجموعة بتاعته وكان عاملهم جدول
كان احيانا بيجبنا بعدج المحاضرات بعد الساعه واحدة ويشرحلنا ربنا يبارك فيه .


فى معيدين تانين اسمع انهم كويسين زى د.تامر و مش فاكرة اسم التانى ^ _ ^



دكاترة الرمد الكبار محترمين وطيبين خالص الا قلة كده .



نقول بقى بندرس ايه فى الروند


العيادة الخارجيه تقريبا فيها كل الشغل لان فيها العيانين وبناخد فيها الشيت
وعلى حسب المعيد اللى معاكم لانه هو اللى بيجيب الحالات



المفروض المعيد بيختار 3 من الطلبة علشان ياخدوا الشيت وواحد منهم بيناقش الشيت مع الدكتور الكبير لما يجى



المعيد بيجى يقولنا المفروض بنشوف ايه ويخلى خمسه خمسه نشوف كل ده والتورش فى عين المسكين العيان



بعد كده يجى الدكتور الكبير ويناقش الشيت او العيان يمشى والدكتور يشرح اى حاجه ..



طبعا احنا حجمنا كبير وبنبقى متكدسين فى الادوة اللى فى العيادة وده فرى نورمال



فيا عينى اول ما العيان يجى والدكتور يختار 3 ياخدوا الشيت وبمجرد الدكتور يسبنا تلاقى الروند كله هجم يتفرج على العيان ..




فى القسم : الدكاترة او المعيدين بيشرحوا وبنشوف سليدز
فى طلبه حركه بتروح العنبر وتتكلم مع المرضى بس ساعات النواب مش بيرضوا او العيانين ميتعاونوش معانا

ملحوظه : عيانين الرمد مش زى الباطنه بمعنى مش بياخدوا فلوس لانهم مش chronic

مستشفى فاروق
طبعا احنا متخيلين اننا حنشبع حالات هناك بما انها مستشفى الرمد
للاسف اللى حصل معانا انه تقريبا كانت 3 حالات اللى شفناها



الباقى كان مجهود شخصى وحابين ازاى تحت ...




فى فاروق كان نفس النظام المعيد يدخل يتكلم شويه وممكن ميلحقش كمان فيجى الدكتور الكبير يكمل .





المواساة او الماّساه
مستشفى مهجورة تحس انها دار اشباح



مش عارفه لسه بيدوا فيها ولا لا اصل انا كنت اول روند رمد



المهم مفيهاش حالات طبعا



بس بناخد فيها سلايدز على برجكتور من ايام الهكسوس سئ جدا ..



وغالبا الدكاترة الكبار مش بيجوا والمعيد بقى اللى بيشرح السلايدز

نصيحة هامه : لا تعتمد على الحالات اللى المعيد بيجبها لانك غالبا انت مش هترضى تاخد الشيت فمش هتشوف كويس فانت خليك شاطر كده قبل ما تدخل الروند فى العيادة الخارجيه روح اقعد جنب العيانين وارغى معاهم

على الاقل لو مشفتش حاجه بالتورش لان فى عيانين بتتعب منه بسرعه يبقى تعرف تاخد شيت لخبرتك الخاصه مش اكتر لانى زى ما حابين نظام الامتحان انك مش هتحتاج غالبا انك تاخد شيت .. انا عن نفسى كنت بروح فاروق علشان احضر مع الدكاترة هناك وهما بيكشفوا كنت بروح عيادة ال cataract ( المياة البيضاء ) كان فى دكتور كويس ولما بنساله بيفهمنا وكان بعد ما بيخلص كشف بال slit lamp ( جهاز مشهور حتعرفوه ) كنا بنبص على عين العيان بالتورش . برده فى عيادات تانيه ممكن تدخلها وتستأذن النائب بس مشكلة فاروق انها بتشتغل لحد 11 اعتقد وبعد كده بيبقى فيه نبطشيه تانيه بتبدأ 1 الساعة او 2 فطبعا عبال لما تخلص الدرس بيكونوا خلصوا كشف فانا كنت بزوغ احيانا او كان فى مرات الدكاترة مش بتيجى او كنت بروح مخصوص بدل اليوم بتاع المواساة .. يعنى تقدر تنتهز اى فرصه وقت فاضى عندك وتروح مستشفى فاروق او العيادة او فى استقبال الرمد ده برده فى مبنى العياده من الداخل بس النائبه اللى هناك غالبا مش بترضى تدخلنا .

المحاضرات




بتبقى بعد الروند محاضرة واحدة من 12-1

كل روند بيخلص محاضرات الرمد كلها فى الشهرين







الدكاترة معظمهم كويسين

نصيحة : احضروا المحاضرات علشان تزاكروا اول باول معاها وحاولوا متراكموش حاجه لان امتحان الروند بيجى فى اخر اسبوع فى الشهرين فيادوب تراجعوا بسرعة .. كمان الروند متغبوش فى ايام العيادة الخارجية والقسم بالنسبه للغياب هما بيضحكوا علينا وبيقولوا مهم وكده بس طلع فى الاخر مش حقيقى ومش بيحاسبوا عليه عكس الكميونتى وباقى المواد .. فى الروند بيتطلب مننا نعمل بحث على موضوع بيحددوه المفروض اننا بناقشه بس ده محصلش عندنا احنا عملناه وسلمناه فى سى دى وبس .

::::::::::::::::::::::::::::::::::::::::::::::::::






ازاى نزاكر




ميزة الرمد اننا بنخلص الكتاب كله فى الروند فبالتالى مش هنشيل همه اننا نكمل مزاكرته فى الميسد

لو حتقدر تسبق الامحاضرات تبقى انتى طالب متميز وحترتاح كتير ومش حتتزنق قبل الامتحان
لو مشيت مع المحاضرات يبقى جميل
لو معرفتش زى ناس ^ _ ^ يبقى حتركز على الاشياء المهمه وربنا يسترها فى الشفوى
هو كتاب الرمد كلامه صغير والصفحة متكدسه دى كانت اكتر حاجه بتغيظنى لان الصفحة بتاخد وقت كبير عبال متخلص وكمان
مفيش مكان ارسم فيها وده بيبوظ مزاجى وانا بزاكر






الرمد مادة لذيذة فى المزاكرة , ممكن تعمل شوية مقارنات تجمع treatment علشان متلغبطش .





:::::::::::::::::::::::::::::::::::::::::::::::





نزاكر منين




انا مجبتش اى ورق فى الرمد

زاكرت من الكتاب وده كفاية
والحقيقة معرفش فيه ورق ولا لا
اهم حاجه علشان امتحان السبوتز وشفوى العملى اننا نزاكر الكتاب الصغنن كويس
وعلشان امتحان الام سى كيو بتاع الروند اننا نحل كل كتاب الاسئلة






:::::::::::::::::::::::::




الامتحــــــان




**امتحان الروند يومين 100 درجة




1.اول يوم فى العيادة الخارجيه : 50 درجة




spots




spots بندخل فى اودة فى العيادة وبنعدى على 10

وتتنوع من عيانين وادوات
حتلاقى عيانين قاعدين وفوقيهم ورقه على الحائط مكتوب عليها
السؤال الاول
comment on the rt eye lid كمثال






السؤال التانى بيكون على اى حاجه فى المنهج وبيكون سهل enumerate , treatment

او ممكن تلاقى ادوات بتكون شفتها قبل كده فى الروند






بعد كده فى




امتحان الشفوى العملى




بتدخل لدكتور واحد وعلى حسب الدكتور ممكن يسالك عملى بس

ممكن نظرى بس وممكن الاتنين
بس لازم لازم تكون عارف الكتاب العملى كويس لان لو غلطت فى العملى بيبقى حاجه وحشه

ملحوظه : ممكن الدكتور يطلب منك انك تفحص عين عيان ادامه

او ممكن مش ادامه يقولك مثلا روح بص على عين العيان وبعدين يسالك او ممكن يخلوا مجموعه منكم ياخدوا شيت كامل من العيان بس مش ادام الدكتور وتدخل للدكتور ممكن يسالك فى الشيت او لا بس دى سهله لانكم بتظبطوا الشيت مع بعض بحيث ميكونش كلامكم متناقض .

**اليوم التانى فى مدرج 3و4 50 درجه



1.امتحان ام سى كيو واكمل




2.وامتحان سلايدز:




10 سلايدز على ما افتكر بيعرضوها عليكم تقريبا بتتعرفوا على سلايدز بس

مش فاكرة
د.محمد ممكن يفتكر
معلش اصل ده كان اول روند
السلايدز بتبقى سهله خالص ان شاء الله

ملحوظه : بتكون فيه مراجعة سلايدز فى اخر الروند بتبقى يومين وبيراجعوا فيهم نفس السلايدز

متفوتوهاش ابدا لانها مهمه وكمان كل العملى موجود فى القسم تقدروا تدخلوا تجميعات طب اسكندريه وان شاء الله حتلاقوه موجود

امتحان اخر السنة




التحريرى: 125 درجة

ورقتين
ام سى كيو ووصل 75
والتانيه




short assay 50 درجة

الشفوى : لجنة واحدة

25 درجة.