دايما "بص وطل" بتحاول تقديم الجديد والمفيد فى نفس الوقت لكل البنات، وبما أن كثير من قارئات "قمر 14" من المحجبات فكان من المهم أن نقدم لهن مفاجأة خاصة عنوانها الأساسي "التجديد والابتكار"، وعشان كده ضيفتنا خبيرة التجميل ومصممة لفات الطرح "ريهام جهاد"...

"ريهام" هي من أجمل مفاجآت "بص وطل" لأن عندها تشكيلة مميزة جداً من تصميمات ولفات الطرح وكلها تتميز بالبساطة وكمان سهلة والجديد في "ريهام" إنها بارعة جدا في المزج بين ألوان لا يمكن أن نتوقع أنها ممكن تمشي مع بعضها...

ازاي دخلتِ عالم التجميل وأصبحت خبيرة تجميل ومصممة لفات؟

في البداية، أنا معجبه جدا بالـSite ودايماً باتابع قمر 14 وعجبتني "نانيس سليم" والعروسة وفكرة الـAfter& before...

اما بالنسبة لدخولى عالم المكياج والموضة والتصميم فبدأ معايا من وأنا في المدرسة.. كنت بحب الرسم جداً وبعشق الألوان بشكل غريب...

كنت في آداب قسم English وبعدها دخلت كلية فنون تطبيقية قسم Fashion.. كان نفسي أتعلم الموضة والتصميم صح وبشكل عملي الكلية ساعدتني كتير وأثقلت موهبتي..

بعد الدراسة بدأت أبحث عن الخبرة العملية في عالم المكياج وكنت سعيدة الحظ والحمد لله قابلت "أحمد القويسني" خبير Makeup وهو لبناني، فعلمني حاجات كتير لأن لبنان بلد الموضة والجمال وهم على اطلاع دائم بأحدث خطوط الموضة في العالم. وكمان قابلت وتعلمت من خبير التجميل "محمد عبد الحميد"..

أما موضوع الـScarf أو تصميم لفات الطرح فالفضل فيه يرجع لماما... ماما عندها أتيليه فساتين زفاف.. كنت بحب ألبّس المانيكان وأضبط لها الطرحة ومن هنا بدأت أصمم لفات كتير... والحمد لله.



عايزين نعرف منك واحدة واحدة كده، لو بنت متحجبة جديد إيه ألوان الطرح اللي لازم تكون عندها بشكل أساسي؟

مبدئيا اللون الأبيض والأبيض السكري الـOff white والبني المحروق، لأن الألوان دي هتدخل في ألوان كتير.



وإيه الربطة اللي تربطها بحيث ماتكرهش الحجاب؟

مبدئياً تحاول على قد ما تقدر تلبس ألوان فاتحة لأن الغامق بيغمق البشرة، وبيدي سن أكبر، ومش مبهج في كل الأحوال.. وأصلاً الموضة دلوقتي الألوان الفاتحة لأننا داخلين على الربيع والصيف.

زي إيه؟!

زي الروز اللي مدي على فوشيا، والـOff white- القريب من الأصفر، والبستاج الهادي، والأخضر الفاتح، أما الربطة فتحاول على حسب وشها تختار الربطة المناسبة.



طيب لو وجهها طويل؟

الربطة العادية مناسبة.. علشان تبرز الخدود تجيب الطرحة بعد الودان على طول ونربطها من الأمام بحيث الخدود تكون بارزة وده هيقلل أو هيحد من طول الوجه.

والربطه العادية كويسة قوي.. كمان للناس اللي عندهم "لغد"... تعتبر أنسب ربطة..

والوجه المدور..؟!!

كل حاجة بتمشي مع الوجه المدور، لكن المدور قوي من تحت فمش مستحب الـSpanish لأنها بتملاه أكثر.

لو واحدة جبهتها عريضة تعالج ده ازاي؟

هنا بنحاول إن الربطة ماتكونش صغيرة، يعني نحاول ندي الوش حجم بحيث يتم الحد من عرض الجبهة.

هل البشرة ممكن تتدخل في اختيار الطرحة؟

لو البشرة تعبانة بنحاول نختار ألوان قوية ده بيعمل زي خداع بصري...

نيجي لأهم حاجة وهي اختيار الألوان... ازاي يا "ريهام" نختار الألوان.. لو واحدة شقراء وعينيها ملونة إيه أفضل الألوان؟!

نصيحتي تبعد عن لون عينيها، يعني بلاش أزرق أو أخضر ممكن تختار الـ Hot colorsالألوان الساخنة درجات "الأحمر- البرتقالي الأصفر" عشان الطرحة تظهر جمالها وممكن لو حابّة تحط إكسسوار يكون لون عينيها...

- ولو واحدة بيضاء وعينيها بني أو عسلي؟

تعلم Mix بين الـHot colors الأحمر والأصفر والبرتقالي طبعا بدرجاتهم حسب لبسها وبين الـ cool colorsالأزرق والسماوي والأخضر والبيج، يعني تمزج بين الألوان الفاتحة والغامقة.. على فكرة المزج بيدي شكل جميل جدا للوجه وبيبرز جماله أكتر.

ولو خمرية وعينيها ملونة!!!!

يبقى حلو جدا عليها الـHot colors -أحمر وأصفر وبرتقالي- وتكون أحلى مع الأحمر..

والخمرية وعينيها بني أو عسلي؟

تختار الـHot colors أحمر وأصفر وبرتقالي... وتبعد عن الأزرق أو اللبني ولو عايزة تعمل Mix بين الـHot، Coolيكون الـCool أكثر يعني مثلاً لو عايزة تلبس بيج في تركواز يكون التركواز أكثر. لأن التركواز لون بارد.

وبالنسبة للاقمشة يا "ريهام"؟ على أساس إيه بتختاري الأقمشه؟

في الشتاء بحب الكتان التقيل اللي داخل فيه فتلة صوف سميكة والأقمشة التخينة عموماً، والربطات تكون طبقات عشان تدفي وعشان كمان اللبس في الشتا بيكون طبقات عشان كده ماينفعش الربطة تكون صغيرة لازم تاخد Volume –حجم- زي اللبس.

وفي الصيف؟

الكتان هيبقى موضة قوي الصيف ده والحاجات اللي على قطن شوية، بس مش كلها، يعني جزء منها يكون قطن وده لأن دايما القطن ألوانه بهتانة.

وفيه خامة اسمها "فوال" وهي قطن سويسري معالج ضد الانكماش.. أنا بحبها قوي.











*******************