كل شئ أصبح محال
بقلم تامر النقيب
==============
أوقفوا الإعدام ياسادة
حركوا حبه الضمير
هو فين العدل فيكم
بالقانون حسموا المصير
مصر بتموت وبإيديكم
وأنتوا قولتوا يلا خير
مش كفايه النار وقادت
والمجاعه بمصر زادت
حتى صوت الظلم طالع
والقلوب جوانا ماتت
وهما عاملين خط سير
للسجون في النفس حائط
والجدار فوق روسنا حاطط
كله ليه ع الظلم ساكت
والمصير نفس المصير
غاز وأزمه وقولنا ماشي
والجنيه عايم وماشي
والدولار بقي ليه شواشي
زى نخل طويل كبير
قالوا فيها الحكم عسكر
قولنا عادي راح يعمر
بس لما طلعنا منظر
الكلام أصبح مرير
هو شعب صحيح مسامح
بس وقت الشدة جارح
وأما راح تبقي فضايح
كله راح يبقي خطير
نفسي نظهر الحقايق
ع اللى بيموتوا ف دقايق
أيوة انا مبقتش طايق
أبقى واحد م الحمير
أوقفوا الإعدام علينا
إحنا م الظلم إنكوينا
والغلا والجوع مالينا
والورود من غير عبير
أوقفوا الإعدام لولدي
وإنظروا لزهرة شبابه
وأفتحوا عيونكم برحمه
وأقروا صفحات من كتابه
هو ليه فكر يسافر
راح ضحيه لبحر غادر
ف الغرق أصبح أسير
أوقفوا الإعدام ياسادة
وإرحموا ولادي الصغار
اللي كان نفسي أشوفهم
يبنوا أوطان بالحلال
بس ياخسارة ياحلمي
كل شئ أصبح محال
تامر النقيب ... من مؤلفاتي وليس منقولا
