بتسألني... شحات فكري
ما تسألينيش بحبك ليه
بحبك وبجنون وخلاص
غريق والحزن بيشده
وحبك خيط أمل وخلاص
********************
بتسألني عن الحلم اللي مات بدري
عن الشجرة اللي طرحت ورد
متلون بلون دمي
عن الدنيا اللي فاتحه لحبنا بابها
عن الصورة اللي رسماها لأحلامنا
وحضناها مع كتابها
بتسألني كتير دايماً
ومش قادر أجاوبها
بجيد لغة اللسان دايماً
ومش شاطر في لغة القلب
ولا باعرف أعيش أحلام بتتلون
بفرشة كدب
دروب الحب رافضاني
أتاري الحب شيء مكتوب
وعيبها إنها بلا عيب
وعيبي إني كلي عيوب
